ԵՐԵՎԱՆ, 26 ՀՈՒՆԻՍԻ, ԱՐՄԵՆՊՐԵՍ: ՀՀ Ազգային ժողովի փոխնախագահ Էդուարդ Շարմազանովի գլխավորած պատվիրակությունը հունիսի 29-ին կմեկնի Մինսկ: Բելառուսի մայրաքաղաքում հայկական պատվիրակությունը կմասնակցի Հայաստանի Հանրապետության Ազգային ժողովի և Բելառուսի Հանրապետության Ազգային ժողովի միջև համագործակցության միջխորհրդարանական հանձնաժողովի 9-րդ նիստին: Ինչպես «Արմենպրես»-ին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից, պատվիրակության կազմում են ԱԺ պատգամավորներ Տաճատ Վարդապետյանը, Գագիկ Մելիքյանը և Արծվիկ Մինասյանը:

Այցի շրջանակներում նախատեսվում են հանդիպումներ Բելառուսի Հանրապետության
Ազգային ժողովի Ներկայացուցիչների պալատի նախագահ Վլադիմիր Անդրեյչենկոյի,
Բելառուսի Հանրապետության Ազգային ժողովի Հանրապետության խորհրդի նախագահ
Միխայիլ Մյասնիկովիչի, Բրեստի մարզային և քաղաքային իշխանությունների
ղեկավարության հետ: Խորհրդարանական պատվիրակությունը կմասնակցի նաեւ Բրեստի
ամրոցի ազատագրման համար զոհված հայ զինվորի հիշատակին նվիրված խաչքարի
բացմանը: