Էդմոն Մարուքյանը Բաղրամյան պողոտան ազատելու այլընտրանք տեսնում է նստացույցն Ազատության հրապարակում շարունակելը
ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: Ազգային ժողովի անկախ պատգամավոր Էդմոն Մարուքյանն այն կարծիքին է, որ ոստիկանությունը պետք է առանձին աշխատանք կատարի Բաղրամյան պողոտայում ակցիայի մասնակիցների մեջ առկա սադրիչների հետ և փորձի նրանց հեռացնել խաղաղ ցուցարարների շարքերից: Պատգամավորն ընդգծեց, որ այս պահին հարկավոր է հանդարտեցնել ժողովրդին:
«Ես կարծում եմ, որ այս պահին հայտնի մարդկանց, հոգևորականների միջոցով հարկավոր է հանդարտեցնել այստեղ հավաքված մարդկանց: Մենք ոստիկանությանն էլ ենք ասել, որ այս բռնությունն անթույլատրելի է, իսկ նրանք էլ ասում են, որ չեն ցանկանում բռնություն կիրառել: Նրանք ասում են, որ ցուցարարների շարքերում կան սադրիչներ, և իրենք ցանկանում են գործողություն իրականացնել: Ես կարծում եմ, որ այս պահին ամենակարևորը կրքերը հանդարտեցնելն է»,- «Արմենպրես»-ի հաղորդմամբ` ասաց Մարուքյանը:
Պատգամավորը նշեց, որ Բաղրամյան պողոտան ազատելու այլընտրանք կարող է լինել Ազատության հրապարակում նստացույցը շարունակելու տարբերակը, ինչը կարող է արդյունավետ լուծում լինել:
Ցուցարարների մի ստված զանգված՝ «Ոչ թալանին» նախաձեռնության անդամների հետ, անսալով ոստիկանության կոչին, տեղափոխվել է Ազատության հրապարակ՝ պատրաստվելով անժամկետ նստացույցի:
Ավելի վաղ Ոստիկանությունն զգուշացրել էր ուժի կիրառման մասին. Ոստիկանապետ Վլադիմիր Գասպարյանը հայտարարել էր, որ եթե հավաքի մասնակիցները չհեռանան, «կմաքրվեն»:
Բաժանորդագրվեք մեր ալիքին Telegram-ում