«Չեմպիոնների լիգա»-ի որակավորման մրցաշարի 4-րդ փուլն ավարտվել է
ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: Չեմպիոնների լիգայի խաղարկության որակավորման մրցաշարի 4-րդ փուլում տեղի են ունեցել վերջին պատասխան հանդիպումները: «Արմենպրես»-ը ներկայացնում է ավարտված հանդիպումներում գրանցված արդյունքները:
«Ռոստով»-«Այաքս» դիմակայությունում առաջին խաղից հետո հաջորդ փուլ դուրս գալու ավելի լավ շանսեր ուներ ռուսական ակումբը: «Ռոստով»-ը մրցակցի դաշտում առաջին խաղում հիանալի հանդես եկավ և կարողացավ արդյունավետ ոչ-ոքիի հասնել՝ 1-1: Պատասխան խաղում ևս ռուսական ակումբն իրեն դրսևորեց լավագույն կողմերով և խոշոր հաշվով պարտության մատնեց հոլանդական տիտղոսակիր ակումբին: Հանդիպումն ավարտվեց 4-1 հաշվով:
«Բորուսիա Մյունխենգլադբախ»-«Յանգ Բոյզ» մրցավեճում հաջորդ փուլ դուրս գալու հիմնական թեկնածուն գերմանական ակումբն էր: Առաջին խաղում շվեյցարացիները սեփական խաղադաշտում անատամ ֆուտբոլ էին ցուցադրել և պարտվել էին 1-3 հաշվով: Պատասխան խաղում գերմանական ակումբն ավելի կազմակերպված խաղաց և հաղթեց 6-1 հաշվով: Հեթ-տրիք ձևակերպեցին Տորգեն Ազարն ու Ռաֆայելը:
«Ապոել»-«Կոպենհագեն» զույգում առաջին խաղից հետո նվազագույն առավելությամբ հաղթում են դանիացիները: Պատասխան հանդիպումը ևս ավարտվեց դանիական ակումբի օգտին: 1-1 հաշիվը խմբային փուլի ուղեգիր տվեց «Կոպենհագեն»-ին:
«Զալցբուրգ»-«Դինամո Զագրեբ» զույգում աննշան առավելությունը տրվում է դաշտի տերերին՝ մրցակցի դաշտում հեղինակած գնդակի շնորհիվ: Առաջին խաղում գրանցված 1-1 հաշիվը արձանագրվեց նաև պատասխան խաղում և մրցավեճը շարունակվեց լրացուցիչ ժամանակում: Այստեղ « Դինամո Զագրեբ»-ը դարձավ գոլի հեղինակ և անցավ խմբային փուլ:
«Մանչեսթեր Սիթի»-«Ստյաուա». այս զույգում 99 տոկոսով հաղթողի բոլոր հարցերը հանված էին: Առաջին խաղն ավարտվել էր 5-0 հաշվով: Պատասխան խաղում ևս հաղթեց անգլիական գրանդը, այս անգամ նվազագույն հաշվով՝1-0:
Չեմպիոնների լիգայի խաղարկությունում հայտնի դարձան բոլոր մասնակից ակումբները:
Բաժանորդագրվեք մեր ալիքին Telegram-ում