ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: «Արմպրոդէքսպո» ցուցահանդեսի շրջանակում հայաստանյան մարզերը ներկայացնում էին իրենց լավագույն արտադրանքը: Լոռու մարզը ցուցադրում էր նաեւ նորամուծություններ:

Մարզի ներկայացուցիչ Մարգարիտա Կիրակոսյանը «Արմենպրես»-ի հետ զրույցում նշեց, որ այս տարի առաջին անգամ փորձնական աճեցրել են հնդկաձավար եւ ունեն հաջող արդյունք:

«Ճիշտ  է, քիչ քանակությամբ ենք աճեցրել, սակայն որակային առումով բավականին լավ, քիչ քիմիկատներով հարստացված բերք ենք ստացել, որը կարծում եմ՝ ապագայում նույնպես հաջողություն կունենա: Ներկայացրել ենք նաեւ բանջարեղենի հին տեսականին, որն արդեն կարծես  բրենդային տեսք ունի: Ունենք   մարզին բնորոշ պանրի, մեղրի տեսականի, կիվի, բրոկոլի, որն ամեն տարի ներկայացնում ենք»,- ասաց նա:

Մարգարիտա Կիրակոսյանի խոսքով՝  ամեն մարզ յուրահատուկ է իրենով, նույն մթերքն ամեն մարզում իր համն ու հոտն ունի:

Ցուցահանդեսին իր գինու տեսականին էր ներկայացնում նաեւ Արմավիրի մարզի «Կարաս» գինիների գործարանը:

«Կարաս» գինիների մարքեթինգի եւ վաճառքի մենեջեր Վլադ Խաչատրյանի համոզմամբ՝ շուկայում գինին ամենապահանջվածներից է:

 «2010 թվականից ի վեր այն օրեցօր հաստատվում եւ ապացուցում է որակը: Գինին արտահանում ենք մի շարք երկրներ՝ Ռուսաստան, Անգլիա, Ֆրանսիա, Բելգիա, Հոլանդիա, Չեխիա, Կանադա եւ այլն:  Նախատեսում ենք այն արտահանել նաեւ Ճապոնիա եւ Չինաստան»,-նշեց մարքեթինգի եւ վաճառքի մենեջերը:

Լուսանկարները` Ֆելիքս Առուստամյանի