ԵՐԵՎԱՆ,  7 ԴԵԿՏԵՄԲԵՐԻ, ԱՐՄԵՆՊՐԵՍ: Զինվորական ծառայությունը սահմանված կարգի խախտմամբ չանցած անձանց համար համապատասխան վճարի դիմաց հետախուզման ցուցակից դուրս գալու հնարավորություն ստեղծով օրենքը ուժի մեջ է և գործում է: Ազգային ժողովում կառավարության հետ հարցուպատասխանի ժամանակ այս մասին ասաց ՀՀ պաշտպանության նախարար Վիգեն Սարգսյանը՝ պատասխանելով ՀԱԿ խմբակցության պատգամավոր Արամ Մանուկյանի հարցին: «Ես՝ որպես պաշտպանության նախարար, ինքս կտրականապես դեմ եմ այս լուծմանը, համարում եմ, որ պետք է անցնել զինվորական ծառայությունը,  ոչ թե դրա դիմաց գումար վճարել:Այս պահին օրենքն ուժի մեջ է, մենք դա երկարացնում ենք, երբ լրանում է դրա կիրարկման  ժամկետը: Մի քանի ամիս առաջ մարդկանց հերթական խումբը ստացել է նման տարեկետում»,- «Արմենպրես»-ի հաղորդմամբ՝ պարզաբանեց նախարարը:

Նախարարը հավելեց, որ միջոցները, որ ստացվում են այդ ծրագրից, շատ հստակ և թափանցիկ երևում են: Դրանք չեն կազմում շատ մեծ դրամական աջակցություն ռազմական խնդիրների լուծման համար:

Հարցին՝ շարունակելո՞ւ է գործել օրենքը, Վիգեն Սարգսյանն ընդգծեց, որ հարցը կքննարկեն կառավարությունում, կզեկուցեն հանրապետության Նախագահին, և, եթե դադարել է օրենքի գործողությունը ու լինի համապատասխան քաղաքական որոշում, կներկայացնեն երկարացնելու միջնորդություն:

Վիգեն Սարգսյանը նաև պարզաբանեց, թե ինչո՞ւ է դեմ նման լուծմանը: «Դա որոշ առումով խթանում է այն մարդկանց մղումները, ովքեր մտածում են երկրից դուրս գալ մինչև 27 տարին լրանալը, հետո փողը վճարել և վերադառնալ երկիր: Ես չեմ կարող շատ մեծ ոգևորություն ապրել նման լուծման առկայության պարագայում:  Ինչո՞ւ է ընդունվել նման օրենք, կան մարդիկ, ովքեր փոքր տարիքից ապրել են արտերկրում, և որպեսզի նրանց համար չփակվի հայրենիք վերադառնալեու ճանապարհը, այսպիսի որոշում է կայացվել»,- եզրափակեց նախարարը: