ՀՎԿ առաջնորդը վարդենիսցիներին ներկայացրեց կուսակցության թեկնածուներին և երկրի զարգացման իր տեսլականը
ԵՐԵՎԱՆ, 25 ՄԱՐՏԻ, ԱՐՄԵՆՊՐԵՍ: Գեղարքունիքի մարզի Վարդենիս համայնքում ընտրողների հետ հանդիպման ժամանակ «Հայկական վերածնունդ» կուսակցության առաջնորդ Արթուր Բաղդասարյանը կոչ արեց ապրիլի 2-ին քվեարկել փոփոխությունների օգտին և փոխել իրենց ու իրենց երեխաների կյանքը: «Արմենպրես»-ի հաղորդմամբ` մարտի 25-ին վարդենիսցիների հետ հանդիպման ժամանակ Արթուր Բաղդասարյանը նշեց, որ գալիք ընտրությունները Հայաստանի համար ունեն վճռորոշ նշանակություն: Նա ցանկություն հայտնեց, որ ներկաները հասկանան իրենց պատասխանատվությունը Հայաստանում փոփոխություններ կատարելու համար:
«Այսօր աշխարհում քաղաքացիության «որս» է: Հայերը կրթված մարդիկ են, բայց մեր երկիրն ամբողջությամբ դատարկվելու է, եթե Հայաստանում լուրջ փոփոխություններ չլինեն: Մենք կողմ ենք, որպեսզի «վաղը» Ազգային ժողովում լինեն մարդիկ, ովքեր ազգի դարդ ու ցավով են մտահոգված: Մենք փոփոխությունը ուզում ենք սկսել նաև Վարդենիսից: Մենք առաջարկում ենք Վարդենիսում քվեարկել ՀՎԿ-ի օգտին: Եթե դուք քվեարկեք մեր օգտին, 10 օր հետո կունենաք Վարդենիսից պատգամավոր, որին ԱԺ-ում կտեսնեք ամեն օր»,-ասաց Բաղդասարյանը:
Նա անընդունելի համարեց, որ մարդը նեղվի նրա համար, որ փող չունի` չկարողանա վիրահատության համար վճարել, կրթություն ստանալ, մանր բիզնես սկսել:
Տարածքում վարկանիշային ընտրակարգով ՀՎԿ-ից առաջադրված թեկնածու` Գարսևան Սաղաթելյանն իր ելույթում անդրադառնալով համայնքների խոշորացմանը նշեց, որ կուսակցական նախընտրական ծրագրերը համահունչ են գյուղական համայնքների զարգացմանը: «Այսօր մենք դեմ ենք խոշորացման ծրագրերին, քանի որ այդ ծրագրերը չեն նպաստում համայնքների զարգացմանը` հակառակը համայնքներում ավելի շատ սոցիալական խնդիրներ են ստեղծում»,- ասաց նա:
Սաղաթելյանը ՀՎԿ-ի նախընտրական ծրագրի կարևոր դրույթներից մեկը համարեց գյուղաբնակ կանանց աշխատանքը, որպես աշխատանքային ստաժ հաշվարկելը:
Իսկ երիտասարդ մյուս վարկանիշային թեկնածու Արա Ալոյանը հորդորեց քաղաքացիներին լինել իմաստուն և խոհեմ` կոչ անելով, հանուն փոփոխության քվեարկել «Հայկական Վերածննդի» օգտին:
Բաժանորդագրվեք մեր ալիքին Telegram-ում