ԵՐԵՎԱՆ, 30 ՄԱՐՏԻ, ԱՐՄԵՆՊՐԵՍ: ՀՀ գյուղատնտեսության նախարարությունը մտադիր է  պարարտանյութից տնտեսված գումարից գյուղատնտեսական տեխնիկայի կայանի կազմակերպման աշխատանքներ իրականացնել: «Արմենպրես»-ի հաղորդմամբ` մարտի 30-ին լրագրողների հետ հանդիպման ժամանակ ՀՀ գյուղատնտեսության նախարար Իգնատի Առաքելյանը նշեց, որ կայանի ծրագիրը պիլոտային է, քանի որ 700 մլն դրամով ամբողջ պահանջարկը չի լինի ծածկել, սակայն մասնավորի հետ միասին կփորձեն ստեղծել միջավայր, երբ առաջին կայանը կատալիզատոր կհանդիսանա մյուս կայանների ստեղծման համար։

«Եթե լիզինգով ապահովվում է խոշոր տնտեսությունների  պահանջարկը, ապա փոքր հողակտոր ունեցողների համար տեխնիկան վարձելու հնարավորություն կլինի, որովհետեւ նրանք միջոց չունեն ձեռք բերելու լիզինգով, կամ ձեռնատու չի նման ծախս անել։ Կայանի հաջողության դեպքում ինքը կխոշորանա ու կմատուցի ավելի լայնամասշտաբ ծառայություն։ Մրցույթը կհայտարարվի մեկ շաբաթվա ընթացքում, ապրիլի վերջին հայտնի կդառնա հաղթողը, իսկ մայիսի վերջին կլինի գյուղտեխնիկան»,-ասաց նա` հավելելով, որ ծրագրին մեծ լավատեսությամբ են վերաբերում, որովհետեւ լիզինգը ծածկում է հանրապետության պահանջարկի միայն մեկ տոկոսը, իսկ այս ծրագիրը թույլ կտա երկկողմանի լուծել այդ հարցը։