Ավելի շատ աշխատանք է պետք ոսկե մեդալին հասնելու համար. Եվրոպայի բրոնզե մեդալակիր Գրիգոր Գրիգորյան
ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: Ազատ ոճի ըմբշամարտի Հայաստանի հավաքականի երկու անդամներ Եվրոպայի վերջին առաջնությունում նվաճեցին երեք բրոնզե մեդալ: Գրիգոր Գրիգորյանը նրանց մեկն է: «Արմենպրես»-ի հետ զրույցում ազատ ոճային ըմբիշը իր տպավորությունները կիսեց Եվրոպայի առաջնությունից, խոսեց առաջիկա անելիքներից:
-Գրիգոր, ինչպե՞ս և եր՞բ սկսեցիք զբաղվել ըմբշամարտով:
-Ըմբշամարտով զբաղվել եմ 11 տարեկանից: Ավելի փոքր տարիքում զբաղվում էի մարմնամարզությամբ, սակայն մարզիչս ասաց, որ ավելի լավ է ըմբշամարտ պարապեմ: Հենց առաջին իսկ մարզումից սիրեցի ըմբշամարտը: 11 տարեկանից մինչ օրս մարզվում, տանջվում եմ, որ արդյունքի հասնեմ: Ավագ եղբայրս էլ էր ըմբշամարտ պարապում, բայց հետագայում թողեց մեծ սպորտը:
-Եվրոպայի վերջին առաջնությունում դարձաք բրոնզե մեդալակիր: Ինչպիսի՞ն է ձեր կարծիքը առաջնության արդյունքների վերաբերյալ:
-Մենք այս առաջնությանը շատ լավ էինք նախապատրաստվել` հավաքների և ուժեղացված մարզումների միջոցով: Իհարկե, Եվրոպայի և աշխարհի առաջնությունները մեզ համար շատ կարևոր են: Ինձ համար Եվրոպայի այս առաջնությունը շատ կարևոր էր, մեծ ցանկություն ունեի հաղթելու, սակայն պարտվեցի թուրք մարզիկին և գրավեցի երրորդ տեղը: Հավատ և կարողություն կար, պարզապես ավելի շատ աշխատանք է պետք ոսկե մեդալին հասնելու համար:
-Մենք նոր մարզիչ ունենք հավաքականում: Ինչպե՞ս է ընթանում աշխատանքը նրա հետ:
-Նախ չէի ցանկանա համեմատել նրան և Բաղդադյանին: Իրենք տարբեր մարզիչներ են: Մկրտչյանն առաջին օրվանից ասաց. «ես ձեր ավագ ընկերն եմ»: Կարծում են, ինչի որ չի հաջողվել նրան հասնել երիտասարդ տարիքում, փորձում է, որ մենք հասնենք: Նրա համար առավել մեծ ուրախություն կլինի, երբ մենք դառնանք չեմպիոններ:
-Գրիգոր, ի՞նչը չեք սիրում ըմբշամարտում:
-Մարզումների համար վազելը: Արագավազք չեմ սիրում:
- Ձեր մեդալների շարքում ունե՞ք, արդյոք, մեկը, որն առանձնանում է:
-Այո, ունեմ այդպիսին` 2014 թվականի Եվրոպայի առաջնության արծաթե մեդալը:
-Ի՞նչ պլաններ ունեք առաջիկայի համար:
-Հիմա արդեն կսկսենք նախապատրաստվել Թբիլիսիի Գրան պրիին: Իսկ դրանից հետո արդեն կսկսենք նախապատրաստվել աշխարհի առաջնությանը:
- Փոխենք հարցերի բնույթը, մի քանի բլից հարց: Ֆուտբո՞լ, թե թենիս:
-Ֆուտբոլ:
-Սո՞ւրճ, թե թեյ:
-Թեյ:
-Գի՞րք, թե ֆիլմ:
-Ֆիլմ:
-Սև՞, թե սպիտակ:
-Սև:
Շնորհակալություն զրույցի համար, ձեզ նորանոր հաջողություններ:
Հարցազրույցը` Վարվառա Հայրապետյանի
Լուսանկարը` Տաթև Դուրյանի
Բաժանորդագրվեք մեր ալիքին Telegram-ում