Գլենդելի «Սիրո ձեռքեր» բարեգործական կազմակերպության անդամները հյուրընկալվել են Սփյուռքի նախարարությունում
12:47, 10 Սեպտեմբեր, 2015ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ սփյուռքի նախարարի խորհրդական Ստեփան Պետրոսյանը սեպտեմբերի 10-ին ընդունել է բարեգործական ծրագիր իրականացնելու նպատակով հայրենիքում գտնվող Գլենդելի «Սիրո ձեռքեր» բարեգործական կազմակերպության ներկայացուցիչներին` Նորա Էլմազյանի գլխավորությամբ: Ինչպես «Արմենպրես»-ին տեղեկացրին ՀՀ սփյուռքի նախարարության մամուլի և հասարակայնության հետ կապերի վարչությունից, ողջունելով հյուրերին՝ Ստեփան Պետրոսյանը բարձր է գնահատել սահմանամերձ գյուղերի բնակիչներին օգնություն ցույց տալու նախաձեռնությունը:
Բարեգործական կազմակերպության ղեկավար Նորա Էլմազյանը ներկայացրել է կազմակերպության գործունեությունը, իրականացրած ծրագրերը, առաջիկա անելիքները, ինչպես նաև անդրադարձել է այցելության շրջանակում սահմանամերձ գյուղերի (Վեդի, Օձուն, Գավառ, Արծվանիստ, Թալին, Նորադուզ, Մարալիկ, Եղեգնավան, Աբովյան, Շուշի, Ստեփանակերտ) անապահով ընտանիքներին և Հայաստանում հաստատված կարիքավոր սիրիահայերին ցուցաբերած օգնությանը:
Նախարարության առաջարկությամբ պատվիրակության անդամները այցելել են և շոշափելի ֆինանսական աջակցություն ցուցաբերել նաև Սիրիայում ընթացող քաղաքական պատերազմի պատճառով վերջերս Քոբանիից Հայաստան տեղափոխված Թովմասյանների բազմանդամ ընտանիքին:
Քննարկվել է նաև Գլենդելի «Հայկազյան» դպրոցին անհրաժեշտ գրքեր և ուսումնական ձեռնարկներ տրամադրելու հարցը:
Պայմանավորվածություն է ձեռք բերվել նախարարության՝ սփյուռքի կրթական հաստատությունների համար գրականության և ուսումնաօժանդակ նյութերի մշակման և տրամադրման ծրագրի շրջանակներում Գլենդելի «Հայկազյան» դպրոցին ապահովել համապատասխան գրականությամբ և ուսումնաօժանդակ նյութերով:
© 2009 ARMENPRESS.am