ԵՐԵՎԱՆ, 19 ՄԱՅԻՍԻ, ԱՐՄԵՆՊՐԵՍ։ Հայաստանում համալսարաններում դասավանդվող առարկաները առանձին հավատարմագրման են ենթարկվելու։ «Արմենպրես»-ի հաղորդմամբ՝ այս մասին մայիսի 19-ին տեղեկացրեց ՀՀ ԿԳ նախարարի պաշտոնակատար Լևոն Մկրտչյանը՝ հավելելով, որ ԲՈՒՀ-երի համար այդ նպատակով ժամկետներ են սահմանվելու։

«Տարիներ առաջ բոլոր պետական բուհերն անցան ինստիտուցիոնալ հավատարմագրում, սակայն աշխարհում չկա բուհի ինստիտուցիոնալ հավատարմագրում` առանց առարկաների ինստիտուցիոնալ հավատարմագրման։ Հիմա պետք է ժամկետ սահմանենք, որի շրջանակներում համալսարաններն իրենց առարկաները առանձին հավատարմագրման ներկայացնեն: Այս ամենը բարդ և մի քիչ թանկ գործընթաց է, բայց այն մեզ կօգնի հասկանալ` տվյալ բուհն իր առաքելության շրջանակո՞ւմ է ընտրում իր մասնագիտությունները, թե՞ ոչ»,- նշեց Մկրտչյանը։

Նախարարի խոսքով, եթե մանկավարժական բուհն ունի «Կադաստրային գործ»բաժին, այն չի կարող գոյություն ունենալ այդ բուհում, քանի որ բուհի առաքելությունից դուրս է: Այսինքն` առարկաների հավատարմագրումը կհստակեցնի բուհական համակարգը:

Բարձրագույն կրթության մասին օրենքի ընդունումից հետո, որը հավանաբար աշնանն արդեն ԱԺ-ի քննարկմանը կդրվի, կսկսվեն հստակեցվել համալսարանների առաքելությունները։ Բոլոր բուհերը համատարած համալսարան չեն կոչվի:

«Համալսարան կկոչվի այն հաստատությունը, որը կիրականացնի կրթական ծրագրեր` առնվազն 4 կրթական ոլորտում, իսկ մնացածները կկոչվեն ինստիտուտներ և ակադեմիաներ: Սա կրթության որակի վրա շատ լրջորեն կազդի, քանի որ այսօր մեր ամենամեծ խնդիրն այն է, որ ծնողը վճարում է իր երեխայի կրթության համար, բայց այդ վճարին համապատասխան որակ չի ստանում»,- ասաց Մկրտչյանը:

Մայիսի 11-ին` կառավարության նիստի ժամանակ, վարչապետ Կարեն Կարապետյանը ԿԳ նախարարի պաշտոնակատար Լևոն Մկրտչյանին հանձնարարել էր մեկ շաբաթվա ընթացքում հանձնարարել էր լրամշակել և կառավարության աշխատակազմին ներկայացնել ,Բուհական կրթության մասինե օրենքի նախագիծը: