ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: ՀՀ կառավարությունը գազի եւ ջրի սակագների թանկացման հետ կապված մինչեւ ապրիլի 1-ը հանդես կգա նախաձեռնություններով եւ կգտնի համապատասխան միջոցներ սոցիալապես անապահով խավերին սատարելու նպատակով: Նման համոզմունք հայտնեց ՀՀ աշխատանքի եւ սոցիալական հարցերի նախարարության Սոցիալական ապահովության պետական ծառայության պետ Վազգեն Խաչիկյանը: Նա նշեց, որ երկրի գործադիր մարմինը ընտանեկան նպաստների վերանայման, սոցիալական այլ սուբսիդավորման տեսակների հետ կապված` նույն խավերին թանկացումները կոմպենսացնելու հնարավորություններ անպայմանորեն կընձեռի: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայաստանի Հանրապետության կառավարությունն այսօր հավանության արժանացրեց «Հյուսիս-հարավ ճանապարհային միջանցքի ներդրումային ծրագրի իրականացման կազմակերպություն` ՊՈԱԿ ստեղծելու եւ ՀՀ տրանսպորտի եւ կապի նախարարությանը գումար հատկացնելու մասին» նախագիծը: Ինչպես նշեց ՀՀ տրանսպորտի եւ կապի նախարար Գուրգեն Սարգսյանը, ՊՈԱԿ-ը զբաղվելու է ՀՀ-ի եւ Ասիական զարգացման բանկի միջեւ կնքված վարկային համաձայնագրի հետ կապված հարցերով: Գ. Սարգսյանի խոսքով, ՊՈԱԿ-ը կզբաղվի նաեւ հետագայում կնքվելիք նման այլ համաձայանգրերի հետ կապված հարցերով, ինչպես նաեւ Հյուսիս-հարավ ճանապարհային միջանցքի ներդրումային ծրագրի իրականացման աշխատանքներով, ֆինանսական կառավարմամբ: 

ՆՅՈՒ ՅՈՐՔ, 11 ՄԱՐՏԻ, ԱՐՄԵՆՊՐԵՍ: Մոսկվան դարձել Է Նյու Յորքից հետո աշխարհի երկրորդ քաղաքը այնտեղ բնակվող «դոլարային» միլիարդատերերի թվով: Այս տվյալները չորեքշաբթի օրը Նյու Յորքում տարածել Է ամերիկյան հեղինակավոր «Ֆորբս» հանդեսը հերթական համարում, որտեղ հրապարակվել Է մոլորակի ամենահարուստ մարդկանց ցուցակը, որն ամեն տարի կազմում են հրատարակության փորձագետները: Ըստ «Ֆորբս»-ի գնահատումների՝ Մոսկվայում Է ապրում ռուսաստանցի 62 միլիարդատերերից 50-ը: ԱՄՆ-ի խոշորագույն քաղաքն իրենց տունն են համարում 60 ամերիկացի մեծահարուստներ: «Բրոնզը» Լոնդոնինն Է (32): 

ԻՐԿՈՒՏՍԿ, 11 ՄԱՐՏԻ, ԱՐՄԵՆՊՐԵՍ: Բայկալ լճում խորքային հորատանցքերից կսկսեն շատ մաքուր ջուր լցնել շշերն Իրկուտսկի մարզի գործարանում: Օրական 1 միլիոն լիտր կարողությամբ ձեռնարկության առաջին հերթը շարք կմտնի 2011 թվականին: Բայկալից ջուրը 450 մետր խորությունից գործարանի հարթակ կտրվի ավելի քան երկու կիլոմետր երկարությամբ խողովակով, քանի որ միայն այդ դեպքում Է այն համապատասխանում բնական խմելու ջրի ստանդարտին, ԻՏԱՌ-ՏԱՍՍ-ին պատմել Է Իրկուտսկի մարզի Սլյուդյանկայի շրջանի վարչակազլմի ղեկավար Գեորգի Տրիֆոնովը: Այստեղ՝ Կուլտուկ ավանում՝ լճի հարավային վերջամասում Էլ կկառուցեն գործարանը, որի պատվիրատուն ու ներդրողն Է դարձել «Բայկալի անմահական ջուր» ընկերությունը: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հանրապետությունում այս տարի տեղի է ունեցել 298 ճանապարհատրանսպորտային պատահար, որի հետեւանքով զոհվել է 40 մարդ, 410-ը ստացել մարմնական վնասվածքներ: Ինչպես այսօր լրագրողների հետ հանդիպման ժամանակ ասաց Հայաստանի ճանապարհային ոստիկանության պետ Մարգար Օհանյանը, նախորդ տարվա նույն ժամանակահատվածի համեմատությամբ վթարների թիվը աճել է 4-ով, վիրավորներինը` 20-ով, զոհերի թիվը նվազել 8-ով: Տարվա ամենամեծ վթարները տեղի են ունեցել մարտի 7-ին եւ 8-ին Մաշտոց-Մոսկովյան եւ Աթենք-Իսակով խաչմերուկներում, որի հետեւանքով տարբեր աստիճանի մարմնական վնասվածքներ են ստացել 16 քաղաքացիներ: 

ՆՅՈՒ ՅՈՐՔ, 11 ՄԱՐՏԻ, ԱՐՄԵՆՊՐԵՍ: Համաշխարհային ֆինանսական ճգնաժամի տարում Ռուսաստանում միլիարդատերերի թիվը մեկ տարի առաջվա 32-ից աճել Է մինչեւ 62: Այդ մասին հաղորդվում Է ըստ Forbes հանդեսի վարկածի մոլորակի ամենահարուստ մարդկանց նոր ցուցակում, որը չորեքշաբթի օրը հրապարակվել Է հրատարակության գրասենյակում եւ նրա վեբ-կայքում: Այն Գործարարների թվի ցուցանիշով, որոնց կարողությունն անցնում Է մեկ միլիարդ դոլարից, Ռուսաստանն զբաղեցրել Է առաջին տեղը Եվրոպայում, երկրորդում Գերմանիան Է՝ Forbes-ի վարկանիշի 53 ֆիգուրանտներով: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: «ՆԱՍԴԱՔ ՕԷՄԷՔՍ ԱՐՄԵՆԻԱ» ԲԲԸ-ում այսօր կայացել է 7998000 ԱՄՆ դոլարի առք եւ վաճառք՝ 392.39 դրամ մեկ ԱՄՆ դոլարի դիմաց միջին կշռված փոխարժեքով: Ինչպես «Արմենպրես»-ին տեղեկացրին Հայաստանի Հանրապետության կենտրոնական բանկից, փակման գինը կազմել է 391.80 դրամ: 

ՍՏԵՓԱՆԱԿԵՐՏ, 11 ՄԱՐՏԻ, ԱՐՄԵՆՊՐԵՍ: Լեռնային Ղարաբաղի Հանրապետության վարչապետ Արա Հարությունյանի մոտ այսօր անցկացված խորհրդակցությունում քննարկվել են անասնապահության զարգացման մի շարք հրատապ հարցեր: Ինչպես «Արմենպրես»-ին տեղեկացրին ԼՂՀ կառավարության տեղեկատվության եւ հասարակայնության հետ կապերի վարչությունից, կառավարության ղեկավարը ոլորտի պատասխանատուներին հրահանգել է անհրաժեշտ միջոցներ ձեռնարկել հանրապետությունում անասնագլխաքանակի պահպանման, արտահանումը կանխելու եւ մսի արտադրության բավարար ծավալներ ապահովելու ուղղությամբ: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայաստանի Հանրապետության ֆինանսների նախարարությունում անցկացված հաշվապահների որակավորման հերթական քննության արդյունքներով 9 հաշվապահի տրամադրվել է որակավորման վկայական: Ինչպես «Արմենպրես»-ին հայտնեցին ՀՀ ֆինասների նախարարության տեղեկատվության եւ հասարակայնության հետ կապերի բաժնից, քննությանը հրավիրվել է 17 դիմորդ, որոնցից 3-ը չի ներկայացել: Նշենք, որ 2010 թվականին անց է կացվել հաշվապահների որակավորման 8 քննություն, որոնց մասնակցել է 119 դիմորդ: Նրանցից որակավորված հաշվապահի վկայական է տրվել 59-ի: Հայաստանում այսօրվա դրությամբ որակավորման վկայական ունի 279 հաշվապահ: 

ՆՅՈՒ ՅՈՐՔ, 11 ՄԱՐՏԻ, ԱՐՄԵՆՊՐԵՍ: Մեքսիկացի Կառլոս Սլիմը 2009 թվականի արդյունքներով դարձել Է աշխարհի ամենահարուստ մարդը՝ երկրորդ հորիզոնական հետ մղելով Բիլ Գեյթսին: Այդ մասին, ինչպես հաղորդում Է «Արմենպրես»-ը, ասված Է Forbes հանդեսի միլիարդատերերի ամենամյա վարկանիշում, որը հրապարակվել Է չորեքշաբթի երեկոյան: Հեռահաղորդակցական շուկայի տիտանը դարձել Է վարկանիշի պատմության մեջ առաջին ոչ ամերիկացին, որը վերջին 16 տարում բարձրացել Է միլիարդատերերի բուրգի գագաթ: Նրա կարողության չափն, ըստ հրատարակության գնահատման, 53,5 միլիարդ դոլար Է: Մեկ տարում այն ավելացել Է 18,5 միլիարդ դոլարով: Microsoft ընկերության հիմնադիր Գեյթսի կապիտալը գնահատվում Է 53 միլիարդ՝ «ընդամենը» 500 միլիոն դոլարով պակաս: Միլիարդատերերի վարկանիշի երրորդ հորիզոնականում կուլտային ներդրող Ուորեն Բաֆետն Է՝ 47 միլիարդ դոլար կարողությամբ: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայաստանի Հանրապետության կառավարությունն այսօր հաստատեց 2001 թվականի սեպտեմբերի 24-ի N 895 որոշման մեջ փոփոխություն կատարելու մասին նախագիծը: Ինչպես նշեց ՀՀ էկոնոմիկայի նախարար Ներսես Երիցյանը, ադամանդագործության եւ ոսկերչության լիցենզավորման լիազոր մարմին ճանաչված էին ՀՀ ֆինանսների եւ էկոնոմիկայի նախարարությունները: Լիցենզավորման գործընթացն ավելի պարզեցնելու համար լիազոր մարմին այսօր ճանաչվեց միայն ֆինանսների նախարարությունը: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Մարտի 17-ին տեղի կունենա Հայաստանի Հանրապետության պետական (գանձապետական) կարճաժամկետ AMGT52163118 թողարկման պարտատոմսերի տեղաբաշխման աճուրդ: Ինչպես «Արմենպրես»-ին տեղեկացրին ՀՀ ԿԲ-ից, թողարկման ծավալը` 1 000 000 000 է: Պարտատոմսերի աճուրդին կարող են մասնակցել ՀՀ ֆինանսների նախարարության կողմից ընտրված դիլերները, որոնք գործում են իրենց անունից եւ իրենց հաշվին կամ իրենց անունից՝ ներդրողների հաշվին, ու գանձապետական պահառուն: Պոտենցիալ գնորդների նկատմամբ սահմանափակումներ չկան: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայաստանի Հանրապետության կառավարությունն այսօր հաստատեց ՀՀ մանկապատանեկան մարզադպրոցներին, մարզաձեւերի ազգային ֆեդերացիաներին եւ այլ մարզական հասարակական կազմակերպություններին գույքով ապահովելու մասին նախագիծը: Դրա նպատակն է կարգավորել մարզակառույցներին, մարզադպրոցներին ու մարզական հասարակական կազմակերպություններին գույքով ապահովելու գործընթացը եւ գույքի բաշխումը: Ծրագրի ֆինանսավորումը 50 մլն դրամ է: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Այսօր կայացել է ՀՀ պետական երկարաժամկետ արժեկտրոնային AMGB20072283 թողարկման պարտատոմսերի առաջնային տեղաբաշխման աճուրդ, որին մասնակցել է 6 գործակալ: Ինչպես «Արմենպրես»-ին տեղեկացրին Հայաստանի Հանրապետության կենտրոնական բանկից, ներկայացված առաջարկությունների ընդհանուր ծավալը կազմեել է 1 833 500 000 դրամ, ներկայացված ոչ մրցակցային առաջարկությունների ծավալը` 60 000 000, բավարարված առաջարկությունների ընդհանուր ծավալը` 1 000 000 000: Տեղաբաշխված պարտատոմսերի սահմանային եկամտաբերությունը 16.3400 % է, միջին կշռված եկամտաբերությունը` 16.1623 %: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայաստանում ապրիլ-մայիսին գնաճը կտրուկ կնվազի: Ինչպես այսօր Հայաստանի Հանրապետության կենտրոնական բանկում լրագրողների համար կազմակերպված սեմինարի ժամանակ ասաց Դրամավարկային քաղաքականության վարչության պետ Արթուր Ստեփանյանը, նույնիսկ ապրիլի 1-ից գազի սակագնի բարձրացումը չի սպառնա այս կանխատեսումների իրականացմանը: Նրա հավաստմամբ, այն կարծիքները, ըստ որոնց`եթե հիմա գնաճը 9.4 տոկոս է, ապա տարվա ընթացքում ավելի կբարձրանա, իրականությանը չեն համապատասխանում: «Եթե մենք հայտարարում ենք, որ սա գնաճի բարձրակետն է, ապա դա ասում ենք համոզված լինելով»,- նշեց Ա. Ստեփանյանը: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայաստանի Հանրապետության կառավարությունն այսօր հաստատեց 2010թ-ին իրականացվելիք «Արի տուն» ծրագրի միջոցառումների ցանկը: Ինչպես նշեց ՀՀ սփյուռքի փոխնախարար Ստեփան Պետրոսյանը, ծրագիրը հաջողությամբ իրականացվել է 2009թ-ին եւ ունի շարունակական բնույթ: Նախատեսվում է այն այս տարի իրականացնել նույն սկզբունքներով` 2 անգամ ընդլայնելով շրջանակները: Ծրագիրը մեկնարկելու է 2010թ. մայիսին եւ շարունակվելու է մինչեւ նոյեմբեր: Այդ ընթացքում Սփյուռքի տարբեր տարածաշրջաններից 13-20 տարեկան մինչեւ 600 երիտասարդներ երկշաբաթյա փուլերով կհյուրընկալվեն հայաստանյան ընտանիքներում: 

ՄՈՍԿՎԱ, 11 ՄԱՐՏԻ, ԱՐՄԵՆՊՐԵՍ: 2010 թվականի կեսին Ռուսաստանում գործազուրկների ընդհանուր թիվը կարող է հասնել 8-9 միլիոնի: Այդ մասին չորեքշաբթի ՌԻԱ «Նովոստի»-ում կայացած մամուլի ասուլիսում հայտնել է Ռուսաստանի անկախ արհմիությունների դաշնության քարտուղար Ալեքսանդր Շերշուկովը: «Ըստ մեր կանխատեսումների` 2010 թվականի կեսին գրանցված գործազուրկների ընդհանուր թիվը կկազմի մոտ 3 միլիոն, իսկ գործազուրկների ընդհանուր թվաքանակը կարող է կազմել 8-9 միլիոն»,- ասել է Շերշուկովը: Ըստ նրա տվյալների` այժմ Ռուսաստանում գրանցված է 2,6 մլն գործազուրկ: 

ՎԱՇԻՆԳՏՈՆ, 11 ՄԱՐՏԻ, ԱՐՄԵՆՊՐԵՍ: ԱՄՆ-ի բյուջետային դեֆիցիտը շարունակում Է տխուր ռեկորդներ սահմանել: Այդ մասին վկայում են երկրի ֆինանսների նախարարության հրապարակած տվյալները: Այսպես, փետրվարին բյուջետային դեֆիցիտը կազմել Է 220,9 մլրդ դոլար: Ուղիղ մեկ տարի առաջ սահմանված նախկին ռեկորդը զիջել Է 14 տոկոսով: 

ԵՐԵՎԱՆ,11 ՄԱՐՏԻ,ԱՐՄԵՆՊՐԵՍ: Հայաստանի Հանրապետության վարչապետ Տիգրան Սարգսյանը այսօր ՀՀ կառավարության նիստում բոլոր նախարարներին հանձնարարեց հսկողության տակ վերցնել միջնաժամկետ ծախսային ծրագրերը: Դրանք պետք է համադրվեն ՀՀ նախագահ Սերժ Սարգսյանի նախընտրական ծրագրի հետ: Բոլոր նախարարները վարչապետին պետք է ներկայացնեն գրավոր զեկուցագիր: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայաստանի Հանրապետության արդարադատության նախարարության դատական ակտերի հարկադիր կատարումն ապահովող ծառայության կողմից հունվար-փետրվարին բռնագանձվել եւ վերականգնվել է 1 մլրդ 554 մլն դրամ՝ նախորդ տարվա նույն ժամանակաշրջանի 375 միլիոն դրամի դիմաց: Ինչպես «Արմենպրես»-ին տեղեկացրեց ԴԱՀԿ ապահովող ծառայության մամուլի քարտուղարը, բռնագանձված եւ վերականգնված գումարի 4,1 անգամ ավելանալու փաստը հիմնականում պայմանավորված է բանկերի եւ վարկային կազմակերպությունների պահանջներով ներկայացված կատարողական թերթերի քանակի կտրուկ աճով: