ԿԱՊԱՆ, 15 ՄԱՐՏԻ, ԱՐՄԵՆՊՐԵՍ: Սյունիքում շարունակվող հորդառատ անձրեւների պատճառով աձանագրվում են արտակարգ իրավիճակների դեպքեր: Մասնավորապես, Սիսիանի տարածաշրջանի Բռնակոթ գյուղի Ղազարի գետի հորդացման հետեւանքով ջրերը լցվել են ափամերձ տների նկուղներն ու գոմերը, ողողել տնամերձ հողամասերը` մեծ վնասներ հասցնելով գյուղացիներին: 

ԿԱՊԱՆ, 15 ՄԱՐՏԻ, ԱՐՄԵՆՊՐԵՍ:Երրորդ օրն է` Կապանին մատակարարվող խմելաջուրը պղտոր է` մուգ հողագույն: Նման երեւույթ միշտ էլ Կապանում արձանագրվել է գարնանը` հորդառատ անձրեւներից հետո: «Հայջրմուղկոյուղի» ՓԲԸ Հարավային մասնաճյուղի «Կապան» տեղամասի պետ Հովհաննես Գեւորգյանը «Արմենպրես»-ին տեղեկացրեց, որ սկսված ձնհալի, ինչպես նաեւ վերջին օրերին տեղացող հորդառատ անձրեւների հետեւանքով մաքրման կայան մուտք գործող ջրի ծավալները զգալիորեն մեծացել են, մինչդեռ կայանը նախատեսված չէ նման քանակության ջրի համար: Ներկայումս ամեն ինչ արվում է բնակչությանը մատակարարվող ջուրն անվտանգ դարձնելու համար: 

ԳԱՎԱՌ, 15 ՄԱՐՏԻ, ԱՐՄԵՆՊՐԵՍ: Գեղարքունիքի մարզպետ Նվեր Պողոսյանը հաստատել է Մեծ հաղթանակի 65-րդ տարեդարձի միջոցառումները մարզում անցկացնելու ծրագիր-ժամանակացույցը: Ինչպես «Արմենպրես»-ին տեղեկացրին մարզպետարանից, վերջինիս աշխատակազմի կրթության, մշակույթի եւ սպորտի վարչության կողմից ներկայացված ծրագիրը նախատեսում է Մեծ հայրենականի մասնակից վետերանների, զոհվածների այրիների հաշվառում, վետերանների մեծարում եւ պարգեւատրում, Հայրենական մեծ պատերազմում զոհվածների հուշարձանների տարածքների բարեկարգում, կանաչապատում, մարզի հանրակրթական դպրոցներում «Մենք հաղթանակի սերունդներ ենք» խորագրով շարադրության մրցույթի կազմակերպում, տոնական համերգների կազմակերպում համայնքներում, շախմատի մեծահասակների մարզային առաջնության անցկացում: 

ՎԱՆԱՁՈՐ, 15 ՄԱՐՏԻ, ԱՐՄԵՆՊՐԵՍ: Վանաձորի 27 կամուրջների մեծ մասը ենթակա է նորոգման: Դրանցից 8-ը նախատեսված է հետիոտնի համար: Ինչպես «Արմենպրես»-ին տեղեկացրին քաղաքապետարանի կոմունալ տնտեսության եւ բարեկարգման բաժնից, նախորդ երկու տարվա ընթացքում ընդամենը երկու հետիոտնային կամուրջ է մասնակի նորոգվել, ընդ որում թիվ 9 միջնակարգ դպրոցի հարեւանությամբ գտնվող կամրջի, որի երկաթե ձողերն էին ծռվել, վերանորոգման համար համայնքի բյուջեից գումար չի հատկացվել: Ըստ բաժնի գլխավոր մասնագետ Պավլիկ Գեւորգյանի` յուրաքանչյուր կամուրջ իր նշանակությունն ունի եւ պետք է վերանորոգել, սակայն անհրաժեշտ ֆինանսական միջոցներ չկան: 

ՎԱՆԱՁՈՐ, 15 ՄԱՐՏԻ, ԱՐՄԵՆՊՐԵՍ: Վանաձորի համայնքային բյուջեից նախորդ տարի շուրջ 30 մլն դրամ է հատկացվել քաղաքի եւս 10 փողոցի գիշերային լուսավորության վերականգնմանը: Նախկինում Լոռու մարզկենտրոնի միայն կենտրոնական մասերն էին լուսավորվում գիշերները, այժմ՝ ծայրամասային 5 թաղամասեր եւս լուսավորված փողոցներ ունեն: 

ԻՋԵՎԱՆ, 13 ՄԱՐՏԻ, ԱՐՄԵՆՊՐԵՍ: Երեւանի կոնյակի գործարանի Բերդի մասնաճյուղում մարտի 12-ին բացվել է թորման արտադրամաս, որին մասնակցել են Տավուշի մարզպետ Արմեն Ղուլարյանը, Բերդի քաղաքապետ Անդրանիկ Շառյանը եւ գործարանի արտադրության տնօրեն Ֆիլիպ Թիբոն: Ինչպես հայտարարել է Երեւանի կոնյակի գործարանի գործադիր տնօրեն Արա Գրիգորյանը, ամեն ինչ արվում է, որպեսզի գյուղացու ստացած խաղողի բերքից ոչ մի ճութ խաղող չմնա գետնին եւ աճեցվածն իրացվի: 

ԻՋԵՎԱՆ, 13 ՄԱՐՏԻ, ԱՐՄԵՆՊՐԵՍ: «Երեւան» մշակութային ակումբի նախաձեռնությամբ եւ «Ասա» ընկերության աջակցությամբ Իջեւանում մարտի 12-ին տեղի է ունեցել մանկական շոու-ծրագիր երեխաների համար, որից ստացված հասույթն ուղղվելու է բարեգործական նպատակներով: Միջոցառումների շարքը մեկնարկել է մարտի 6-ին` Ստեփանակերտ քաղաքից, ավարտը կլինի ապրիլի 7-ին Արմավիրի մարզի Մեծամոր քաղաքում: 

ԱՐՏԱՇԱՏ, 12 ՄԱՐՏԻ, ԱՐՄԵՆՊՐԵՍ: Արարատի մարզպետ Վարդգես Հովակիմյանն այսօր ընդունեց ՀՀ-ում ՌԴ արտակարգ եւ լիազոր դեսպան Վյաչեսլավ Կովալենկոյին եւ նրա ղեկավարած պատվիրակությանը: Ջերմ ընդունելությունից հետո դեսպանը տեղեկացրեց, որ այցն ունի ճանաչողական եւ գործնական նպատակ, եւ ասաց, որ Հայաստանը այն պետություններից է, որի հետ պատմական հարաբերությունները ոչ թե քայքայվում, այլ զարգանում են: «Մենք շահագրգիռ ենք տարածաշրջանի զարգացմամբ, հատկապես ՌԴ սուբյեկտների եւ Արարատի մարզի միջեւ ստեղծված հարաբերություններով»,-ասաց Վ. Կովալենկոն: 

ԱՐՏԱՇԱՏ, 12 ՄԱՐՏԻ, ԱՐՄԵՆՊՐԵՍ: Արարատի մարզում 2009 թ-ին իրականացվել են քաղաքային համայնքների բարեկարգման աշխատանքներ: Ինչպես «Արմենպրես»-ին տեղեկացրեց Արարատի մարզպետարանի աշխատակազմի քաղաքաշինության վարչության գլխավոր մասնագետ Եփրեմ Հակոբյանը, Մասիս քաղաքում համայնքային բյուջեից 12 մլն դրամ է տրամադրվել բազմաբնակարան շենքերի տանիքների վերանորոգմանը, 21,09 մլն դրամ՝ փողոցային լուսավորության ապահովմանը: 

ԳԱՎԱՌ, 12 ՄԱՐՏԻ, ԱՐՄԵՆՊՐԵՍ: Հայաստանի ոստիկանության Գեղարքունիքի մարզային վարչության ստորաբաժանումներում մարտի 1-7-ը գրանցվել է 38 դեպք: Ինչպես «Արմենպրես»-ին տեղեկացրին մարզային վարչությունից, ոստիկանության Գավառի բաժնում արձանագրվել է զենքի եւ ռազմամթերքի կամովի հանձնման 6, այլ պետություն երեխայի ապօրինի տեղափոխման 1 դեպք: 

ԳԱՎԱՌ, 12 ՄԱՐՏԻ, ԱՐՄԵՆՊՐԵՍ: Գավառի մանկատան սաների թիվը տարեցտարի նվազում է: Ինչպես «Արմենպրես»-ին տեղեկացրեց մանկատան տնօրեն Նիկոլայ Նալբանդյանը, նախորդ տարվա մարտին մանկատունն ունեցել է 83 սան, այսօր նրանց թիվը պակասել է 4-ով: Ըստ տնօրենի` դա պայմանավորված է երկու հանգամանքով` խնամատար ընտանիքի ինստիտուտի ներդրմամբ եւ կառավարության կողմից մանկատներում երեխաներ ընդունելու չափանիշների խստացմամբ: 

ԳԱՎԱՌ, 12 ՄԱՐՏԻ, ԱՐՄԵՆՊՐԵՍ: Գեղարքունիքի մարզի Սոթք գյուղի համայնքային բյուջեն այսուհետ կուղղվի գյուղի զարգացմանը: Ինչպես «Արմենպրես»-ի հետ զրույցում նշեց համայնքի ղեկավար Կոլիկ Շահսուվարյանը, 2008 թվականի նոյեմբերին համայնքի ղեկավար ընտրվելուց, նաեւ ավագանու փոփոխությունից հետո նախորդ ղեկավարությունից «ժառանգել» է 19 միլիոն դրամի աշխատավարձի եւ սոցվճարների պարտք, կալանքի տակ հայտնված տեղական բյուջե: 

ԿԱՊԱՆ, 12 ՄԱՐՏԻ, ԱՐՄԵՆՊՐԵՍ: Կապանի ավագանու որոշմամբ 2010թ-ի բյուջեի վարչական մասի պահուստային ֆոնդից 2 մլն 640 հազ. դրամ է տրամադրվել «Ազատամարտ» հկ-ին` զոհված ազատամարտիկների ուսանող երեխաներին 2009-2010 ուստարվա երկրորդ կիսամյակում օգնության նպատակով: 

ԳԱՎԱՌ, 11 ՄԱՐՏԻ, ԱՐՄԵՆՊՐԵՍ: Գեղարքունիքի մարզպետ Նվեր Պողոսյանն այսօր ընդունեց «Եկեղեցիների համաշխարհային խորհրդի միջեկեղեցական բարեգործական Հայաստանյան կլոր սեղան» հիմնադրամի գործադիր տնօրեն Կարեն Նազարյանին եւ Գեղարքունյաց թեմի առաջնորդական տեղապահ Մարկոս եպիսկոպոս Հովհաննիսյանին: 

ԳՅՈՒՄՐԻ, 11 ՄԱՐՏԻ, ԱՐՄԵՆՊՐԵՍ: Գյումրու «Մուշ» թաղամասում պետական միջոցներով կառուցվող բնակելիները լիովին շահագործման պատրաստ կլինեն մայիսի վերջերին: Այս պահին ընթանում են ծեփագործական, ներկարարական, գազիֆիկացման եւ ջեռուցման համակարգերի տեղադրման աշխատանքներ: 

ՎԱՆԱՁՈՐ, 11 ՄԱՐՏԻ, ԱՐՄԵՆՊՐԵՍ: Այսօր Վանաձորում գտնվող Հայաստանում Բելառուսի Հանրապետության արտակարգ եւ լիազոր դեսպան Ստեպան Սուխարենկոն հանդիպեց Հայրենական Մեծ պատերազմի վանաձորցի վետերանների հետ: Մեծ Հայրենականի 65-ամյակի կապակցությամբ, Բելառուսի դեսպանը մեդալներ հանձնեց վետերաններին, շնորհակալական խոսք ասաց պատերազմի, իր հայրենիքի ազատագրման գործում իրենց ներդրումն ունեցող մասնակիցներին: Ըստ Ս. Սուխարենկոյի, իր երկրի նախագահի հանձնարարությամբ նա այսօր Վանաձոր է ժամանել երախտագիտություն հայտնելու այն մարդկանց, ովքեր իրենց կյանքն են վտանգել ֆաշիզմից, ներկայում ազատ եւ բարգավաճող Բելառուսի ազատագրման համար: 

ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Կոտայքի մարզում մարտի 10-ին ձնհալի հետեւանքով հեղեղվել է Սոլակ գյուղի կենտրոնական թաղամասը: Իրավիճակին ծանոթանալու նպատակով դեպքի վայր են մեկնել Կոտայքի մարզային փրկարարական վարչության մասնագետները: Տեղում պարզվել է, որ հեղեղի հետեւանքով զգալիորեն վնասվել են գյուղի` մոտ 1 կմ երկարությամբ կենտրոնական փողոցը եւ 6 բնակելի տներ: Վնասի չափը ճշտվում է: 

ԱՐՏԱՇԱՏ, 11 ՄԱՐՏԻ, ԱՐՄԵՆՊՐԵՍ: Արարատի մարզում գործում է մարզպետին կից Կանանց խորհուրդ: Ինչպես «Արմենպրես»-ին տեղեկացրեց Հայաստանի Հանրապետական կուսակցության Արարատի մարզային խորհրդի նախագահ Սոնա Պողոսյանը, կանանց խորհրդում այս պահին ընդգրկված է ՀՀԿ, ՕԵԿ, ՀՅԴ, ԲՀԿ կուսակցությունների շուրջ 20 ներկայացուցիչ` մարզի յուրաքանչյուր տարածաշրջանից հավասարապես: Ս. Պողոսյանի խոսքով, խորհրդի անդամների թիվն առաջիկայում կավելանա, քանի որ նպատակ կա նաեւ ընդգրկելու հկ-ների ներկայացուցիչների: 

ԱՐՏԱՇԱՏ, 10 ՄԱՐՏԻ, ԱՐՄԵՆՊՐԵՍ: Հայաստանի ՓՄՁ սուբյեկտներին հարկային օրենսդրության վերջին փոփոխությունների ծանոթացնելու նպատակով այսօր Արարատի մարզի Արտաշատ քաղաքում անցկացվեց սեմինար` Փոքր եւ միջին ձեռնարկատիրության զարգացման ազգային կենտրոնի (ՓՄՁ ԶԱԿ) հիմնադրամի աջակցությամբ: Սեմինարին մասնակցեց մարզի շուրջ 25 հաշվապահ եւ գործարար, այն վարում էր ««Ա.Ա.Մ.» հաշվապահական վերլուծական կենտրոնի գլխավոր մասնագետ Սամվել Միրզոյանը: Նա ներկայացրեց ոլորտում առկա փոփոխությունները, դրանցում առկա ՓՄՁ սուբյեկտների համար դրական հնարավորությունները, վերջերս տպագրված «ՓՄՁ սուբյեկտների հարկային հաշվառման պարզեցված ուղեցույցը», տեղի ունեցավ քննարկում: 

ԻՋԵՎԱՆ, 10 ՄԱՐՏԻ, ԱՐՄԵՆՊՐԵՍ: Հայաստանի Հանրապետությունում Բելառուսի դեսպան Ստեփան Սուխարենկոն մարտի 9-ին այցելել է Տավուշի մարզ: Մարզպետ Արմեն Ղուլարյանը դեսպանին ներկայացրել է Տավուշը` գրաված դիրքով, համայնքներով, տնտեսությամբ, զարգացման հեռանկարներով, պատմամշակութային հուշարձաններով: