ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության մշակույթի նախարարության նախաձեռնությամբ եւ Հայաստանի կառավարության գումարային հատկացումով Արամ Խաչատրյան համերգասրահն արդեն ունի Համբուրգի արտադրության «Steinway» ֆիրմայի նոր ռոյալ: Ինչպես այսօր լրագրողների հետ հանդիպման ժամանակ նշեց Հայաստանի պետական ֆիլհարմոնիայի տնօրեն Ռուզաննա Սիրունյանը, ռոյալն արդեն Հայաստանում է եւ այն արդեն հնարավոր կլինի գործածել երեւանյան 4-րդ միջազգային երաժշտական փառատոնի ժամանակ: «Ռոյալը գնելու համար ՀՀ կառավարությունը պահուստային ֆոնդից տրամադրել է 62 մլն դրամ: Կոնկրետ ռոյալն արժի 99 հազար եվրո, իսկ մնացած գումարը պետական տուրքերի համար են նախատեսված»,- ասաց Ռուզաննա Սիրունյանը` ավելացնելով, որ այն տեղափոխվել է ինքնաթիռով: 

ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Սեպտեմբերի 11-ին Երեւանում կմեկնարկի երեւանյան 4-րդ միջազգային երաժշտական փառատոնը, որը կշարունակվի մինչեւ հոկտեմբերի 22-ը: Փառատոնը կանցկացվի ՀՀ առաջին տիկին Ռիտա Սարգսյանի եւ սըր Սայմոն Բոուզ-Լայընի բարձր հովանու ներքո: 

ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: «Նարեկացի» արվեստի միությունում այսօր կայացավ գրական-երաժշտական ցերեկույթ` նվիրված նկարիչ, բանաստեղծ, արձակագիր Արեւշատ Ավագյանի 70-ամյա հոբելյանին: Միջոցառման ժամանակ բացվեց Արեւշատ Ավագյանի աշխատանքների ցուցահանդեսը եւ հնչեցին նրա հեղինակած բանաստեղծությունները, դրանց հիման վրա գրված երգերը: 

ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Սեպտեմբերի 11-ից հոկտեմբերի 22-ը վաստակավոր կոլեկտիվ Հայաստանի պետական ֆիլհարմոնիկ նվագախումբը` գեղարվեստական ղեկավարներ Էդուարդ Թոփչյանի և Ալեքսանդր Չաուշյանի ղեկավարությամբ ու ՀՀ նախագահի տիկնոջ` Ռիտա Սարգսյանի ու Սըր Սայմոն Բոուզ-Լայընի (Մեծ Բրիտանիա) բարձր հովանու ներքո, Արամ Խաչատրյան համերգասրահում կներկայացնի 4-րդ Երեւանյան միջազգային երաժշտական փառատոնը: 

ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Երեւանի պետական համալսարանում այսօր բացվեց մի շարք միջազգային մրցույթների մասնակցած Աշոտ Պողոսյանի եւ Ռուբեն Բաղդիշյանի լուսանկարների ցուցահանդեսը` «Հայաստանի կագնեցված պահեր» խորագրով: Ցուցահանդեսում ներկայացված էին նկարիչների վերջին ամիսներին ստեղծած լավագույն լուսանկարները` Հայաստանի եւ Արցախի տեսարժան, պատմամշակութային վայրերի, ինչպես նաեւ բնության պատկերներով: 

ՍԱՆԿՏ ՊԵՏԵՐԲՈՒՐԳ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Սանկտ Պետերբուրգի նկարիչների միության տանը օրերս բացվել է Հայաստանի ազգային պատկերասրայի տնօրեն, պրոֆեսոր Փարավոն Միրզոյանի ստեղծագործությունների ցուցահանդեսը: Ներկայացված են անվանի նկարչի 50 առավել ուշագրավ, բարձրարվեստ գործերը, որոնք դիտողին գրավում են ժանրի ու թեմատիկայի բազմազանությամբ, գույների կախարդական համադրությամբ, կտավի ծավալային ու կոմպոզիցիոն կառուցվածքի միջոցով պատկերի ընկալումը զգացումայինի վերածելու զորությամբ: 

ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: «Պարույր Սեւակ» գրական-մշակութային ակումբը նախատեսում է հոկտեմբերին Երեւանում անցկացնել Սեւակյան օր: Ինչպես «Արմենպրես»-ին հայտնեցին ակումբի հիմնադիր «Մենք» խմբի անդամները, քաղաքի տարբեր հատվածներում` Պանթեոնում, Զեյթունում` Սեւակի արձանի դիմաց, դպրոցականներն ու ակումբականները կարտասանեն Սեւակի ստեղծագործություններից: 

ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Մինաս Ավետիսյանի թանգարանը բացառիկ հավաքածու ունի: Ինչպես «Արմենպրես»-ին հայտնեց թանգարանի տնօրեն Արման Ավետիսյանը, այս թանգարանը Հայաստանի ազգային պատկերասրահի մասնաճյուղն է եւ գյուղի ու հարակից համայնքների միակ պատկերասրահը: Ըստ Ա. Ավետիսյանի` այն շատ կարեւոր մշակութային նշանակություն ունի. այստեղ կազմակերպվում են բազմաթիվ ցուցահանդեսներ, միջոցառումներ: Թանգարանը ծավալում է ակտիվ գործունեռություն: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ սփյուռքի նախարար Հրանուշ Հակոբյանն այսօր ընդունել է հայ միջնադարյան երաժշտության «Օշական» համույթի ղեկավար Գրիգոր Առաքելյանին եւ պրոդյուսեր ֆրանսահայ Ռոժե Պիրանյանին: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Սեպտեմբերի 9-ին կլրանա կինոգործիչ, օպերատոր Լեւոն Աթայանցի 80-ամյակը, ինչի առիթով առաջին անգամ հանդիսատեսի դատին կհանձնվեն 1994 թ.-ի նրա լուսանկարներից 20-ը` «Հաղթանակից առաջ» խորագրի ներքո: 

ԵՐԵՎԱՆ, 8 ՍԵՊՏԵՄԲԵՐի, ԱՐՄԵՆՊՐԵՍ: «ՌեԱնիմանիա» միջազգային անիմացիոն կինոփառատոնի շրջանակներում Հայաստանում է գտնվում գերմանացի անիմատոր Յոհաննես Ուոլթերսը, ով այսօր լրագրողների համար անցկացրել է անիմանացիայի հատուկ դասընթաց: Ինչպես այսօր լրագրողների հետ հանդիպման ժամանակ նշեց Յոհաննես Ուոլթերսը, դժվար է խոսել լրագրողների հետ վարպետության դասընթացի արդյունավետության մասին, քանի որ դրա ընթացքում խոսվել է ամենատարբեր թեմաների մասին: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանը բնական գիտությունների ոլորտում բարձր վարկանիշ ունեցող երկիր է: Հայ գիտնականների տպագրած հոդվածներով եւ վերջիններիս կատարված հղումների քանակով Հայաստանը բավական առաջ է տարածաշրջանի մյուս երկներից` Ադրբեջանից եւ Վրաստանից: Այս մասին այսօր լրագրողների հետ հանդիպման ժամանակ հայտարարեց Հայաստանի կրթության եւ գիտության նախարարության Գիտության պետական կոմիտեի նախագահ Սամվել Հարությունյանը` նշելով, որ վերջին տասնութ տարիներին միջազգային բարձր վարկանիշ ունեցող ամսագրերում հայ գիտնականներին պատկանող ավելի քան 6 հազար աշխատանք է տպագրվել, նրանց ավելի քան 46 հազ. հղումներ են կատարվել: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ գիտությունների ազգային ակադեմիայում կստեղծվի ԳԱԱ ««Հայկենսատեխնոլոգիա» գիտաարտադրական կենտրոն» պետական ոչ առեւտրային կազմակերպություն: Կենտրոնը կհիմնվի «Կենսատեխնոլոգիայի գիտահետազոտական ինստիտուտ» բաժնետիրական ընկերության եւ ՀՀ ԳԱԱ «Միկրոբիոլոգիայի եւ մանրէների ավանդադրման կենտրոն» պետական ոչ առեւտրային կազմակերպության միաձուլումից: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Անվանի գեղանկարիչ Վլադիմիր Աթանյանի ծննդյան 70 եւ ստեղծագործական 50 ամյակների կապակցությամբ սեպտեմբերի 26-ին Կալիֆորնիա նահանգի Գլենդեյլ քաղաքում կանցկացվի հոբելյանական հանդես: Կազմակերպիչներն են հոբելյանական հանձնաժողովը եւ «Աթանյան» արվեստի կենտրոնը: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Սեպտեմբերի 9-ին կմեկնարկի «ՌեԱնիմանիա» միջազգային անիմացիոն կինոփառատոնը, որը կշարունակվի մինչեւ սեպտեմբերի 13-ը: Ինչպես այսօր լրագրողների հետ հանդիպման ժամանակ նշեց փառատոնի տնօրեն Վրեժ Քասունին, փառատոնի մեկնարկը կտրվի Սիլվան Շոմենի «Աճպարարը» ֆիլմով: «Փառատոնի ընթացքում կցուցադրվի նաեւ Շոմենի «Եռյակը Բելվիդից» ֆիլմը»,- ասաց նա` ավելացնելով, որ Շոմենի ֆիլմերի յուրահատկությունը նրանում է, որ ֆիլմում երկխոսությունները քիչ են: 

ԼՈՆԴՈՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Մեծ Բրիտանիայի Քեմբրիջի համալսարանն առաջին տեղն Է զբաղեցրել համալսարաների QS միջազգային վարկանիշում: Այդ մասին, ինչպես հաղորդում Է «Արմենպրես»-ը, այսօր տեղեկատվություն Է հրապարակել բրիտանական «Գարդիան» թերթը: Վարկանիշի հաջորդ տեղերում ամերիկյան բարձրագույն ուսումնական հաստատություններն են, երկրորդ տեղում՝ Հարդարդի համալսարանը, իսկ երրորդում՝ Ելի համալսարանը: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Հայ արվեստագետները բազմաբնույթ խնդիրներ ունեն թե սփյուռքում, թե հայրենիքում: Այս մասին «Արմենպրես»-ի հետ զրույցում նշեց կանադահայ քանդակագործ Գեւորգ Կասսաբյանը, ավելացնելով, որ Հայաստանը, Սփյուռքն ու Արցախը մեկ միասնություն, մեկ մարմին են, եւ ՀՀ սփյուռքի նախարարության կողմից կազմակերպված Կերպարվեստի գործիչների համահայկական համաժողովի միջոցով պետք է ձգտել օգնության ձեռք մեկնել բոլոր հայ արվեստագետներին: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Երեւանում սեպտեմբերի 22-24-ը կանցկացվի գրքի ցուցահանդես-վաճառք, որը կազմակերպում է Հրատարակիչների ազգային ասոցիացիան ՀՀ մշակույթի նախարարության եւ Երեւանի քաղաքապետարանի աջակցությամբ: Ինչպես «Արմենպրես»-ի հետ զրույցում նշեց Հրատարակիչների ազգային ասոցիացիայի գործադիր տնօրեն Վահան Խաչատրյանը, ցուցահանդես-վաճառքին մասնակցելու են հանրապետության 40 հրատարակչություններ, որոնք կներկայացնեն վերջին տարիներին հրատարակված լավագույն գրքերը: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Երեւանում սեպտեմբերի 14-18-ը Կրթության ազգային ինստիտուտը կկազմակերպի ուսուցիչների խորհրդակցություններ: «Արմենպրես»-ի հետ զրույցում ինստիտուտի տնօրեն Նորայր Ղուկասյանը բավական արդյունավետ համարեց խորհրդակցությունները, որոնք անցկացվել են նաեւ մարզերում. դրանց մասնակցել է 7300-ից ավելի ուսուցիչ: Ըստ նրա` երեւանյան խորհրդակցություններին կմասնակցեն Երեւանի բոլոր դպրոցների ուսուցիչները` շուրջ 2000: Բոլոր ուսումնական առարկաների գծով ինստիտուտի մասնագետները քննարկումներ կունենան նրանց հետ եւ պարզաբանումներ կտան վերջիններիս հարցերին: 

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Երեւանում հոկտեմբերի 25-31-ը կանցկացվի «Նռան հատիկ» մանկապատանեկան թատերական 10-րդ փառատոնը, որին կմասնակցի 32 թատերախումբ Հայաստանից, Ջավախքից, Իրանից: Ինչպես «Արմենպրես»-ին տեղեկացրեց փառատոնի կազմկոմիտեի նախագահ Հասմիկ Կարապետյանը, Իրանից փառատոնին առաջին անգամ է թատերախումբ մասնակցում: