Գյուտի կարճաժամկետ արտոնագիրը կտրվի ավելի արագ և քիչ ծախսերով. ԱԺ-ն ընդունեց օրինագիծը
ԵՐԵՎԱՆ, 3 ՄԱՐՏԻ, ԱՐՄԵՆՊՐԵՍ: ՀՀ ազգային ժողովը երկրորդ ընթերցմամբ և ամբողջությամբ ընդունեց Արտոնագրերի մասին օրենքի և կից ներկայացված օրենքների նախագծերի փաթեթը, որով, ի թիվս այլ փոփոխությունների, առաջարկվում էր հնարավորություն ստեղծել ավելի արագ և քիչ ծախսերով ստանալու գյուտի կարճաժամկետ արտոնագիր՝ 10 տարի ժամկետով:
«Արմենպրես»-ի փոխանցմամբ՝ նախագիծը հեղինակել է ՀՀ կառավարությունը:
ՀՀ էկոնոմիկայի փոխնախարար Վարոս Սիմոնյանը նախագծի ներկայացման ընթացքում նշեց, որ Արտոնագրերի մասին օրենքի նախագծով նախատեսվում է հստակեցնել պահպանման փաստաթղթերի ձևերը, որոնց հիման վրա ՀՀ-ում իրականացվում է գյուտերի իրավական պահպանությունը:
«Միևնույն ժամանակ, օրենքից դուրս ենք հանում «օգտակար մոդել» հասկացությունը, դրա փոխարեն ներդրվում է «գյուտերի կարճաժամկետ արտոնագիր» պահպանման փաստաթղթի նոր ձևը: Գյուտերի կարճաժամկետ արտոնագիրը թույլ է տալիս առավելագույնը 10 տարի ժամկետով գրանցել գյուտը: Այս մեթոդիկան համահունչ է ԵՄ և այլ երկրներին»,- ասաց Սիմոնյանը:
Գյուտի կարճաժամկետ արտոնագիր ստանալու հայտ ներկայացնելով՝ հայտատուները հնարավորություն են ունենում ավելի արագ և քիչ ծախսերով, ի տարբերություն գյուտի արտոնագրի, ստանալ արտոնագիր՝ 10 տարի գործողության ժամկետով: Նախագծերի փաթեթով առաջարկվում է ներդնել երրորդ անձանց կողմից գործող գյուտի կարճաժամկետ արտոնագրի դեմ առարկությունների ներկայացման ընթացակարգը: Գործող պրակտիկայով ժամկետը 6-9 ամիս է:
Օրինագիծն ընդունվեց 90 «կողմ», 8 «դեմ» և 14 «ձեռնպահ» ձայներով: