Առևտրաարդյունաբերական պալատը զեկույց է կազմել բիզնես ոլորտում առնչվող խնդիրների վերաբերյալ
ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ: Երևանում մայիսի 31-ին մեկնարկեց «Ազգային բիզնես հարցման արդյունքների ամփոփում և առաջարկությունների վերհանում» թեմայով աշխատաժողովը: Ինչպես տեղեկացնում է «Արմենպրես»-ը, միջոցառումը կազմակերպել է ՀՀ առևտրաարդյունաբերական պալատը։
2021 թվականի փետրվար-ապրիլ ամիսներին ՀՀ առևտրաարդյունաբերական պալատի հետ համագործակցությամբ, «Այ Էմ Առ» հետազոտական կազմակերպությունն իրականացրել է հարցումներ ձեռնարկությունների շրջանում, Երևանում և ՀՀ բոլոր մարզերում:
Համապարփակ հարցումները նպատակ են ունեցել վեր հանել տնտեսական միջավայրի բարելավմանն ուղղված օրենսդրական առաջարկությունները գործարարների կողմից, պարզել համավարակի և պատերազմի տնտեսական հետևանքները, գործարար համայնքի համար գնահատել համավարակի և պատերազմի տնտեսական հետևանքների չեզոքացմանն ուղղված կառավարության կողմից իրականացվող ծրագրերը, բացահայտել կոռուպցիոն ընկալումների, ինչպես նաև կոռուպցիայի դեմ պայքարի արդյունավետ միջոցների կիրառման խնդիրները ձեռնարկություններում:
Հարցումների տվյալների հիման վրա կազմվել է ընդլայնված զեկույց, որտեղ ներկայացված են հարցումների ընթացքում ի հայտ եկած հիմնական խնդիրներն ու մարտահրավերները։ Միաժամանակ ամփոփվել են նաև վերոնշյալ խնդիրների հաղթահարմանն ուղղված գործարար համայնքի կողմից հնչեցված առաջարկությունները։ Հարցումներն իրականացվել են ՀՀ առևտրաարդյունաբերական պալատի և Միջազգային մասնավոր ձեռնարկատիրության կենտրոնի (CIPE, ԱՄՆ, Վաշինգտոն) համագործակցությամբ: Զեկույցի և աշխատաժողովի արդյունքների հիման վրա ՀՀ առևտրաարդյունաբերական պալատի կողմից կամփոփվեն ներկայացված առաջնահերթությունները։ Նշված առաջներթությությունների հիման վրա կձևավորվի առաջարկությունների փաթեթ, որը կներկայացվի պետական քաղաքականություն մշակող մարմիններին։