Առնո Բաբաջանյանի հոբելյանը «Մոսկվայի տուն» կենտրոնը տոնեց «7 երգ Մոսկվայի մասին» համերգով
ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ: Երևանում «Մոսկվայի տուն» մշակութագործարարական կենտրոնի նախաձեռնությամբ կայացավ մեծ համերգ՝ նվիրված կոմպոզիտոր Առնո Բաբաջանյանի 100-ամյակին։ Երեկոն տեղի ունեցավ Ռուսաստանի մայրաքաղաքի 874-ամյակի միջոցառումների շրջանակում:
«Արմենպրես»-ի հաղորդմամբ՝ «7 երգ Մոսկվայի մասին» համերգում հանդես եկավ Հայաստանի ազգային ֆիլհարմոնիկ նվագախումբը՝ գեղարվեստական ղեկավար և գլխավոր դիրիժոր Էդուարդ Թոփչյանի գլխավորությամբ։
Հնչեցին հանրաճանաչ կոմպոզիտորի՝ Մոսկվայի մասին, նաև այլ թեմաներով գրված ստեղծագործություններ:
«Առնո Բաբաջանյանը Մոսկվային նվիրված բազմաթիվ ստեղծագործությունների միջոցով իր սերն էր արտահայտում Ռուսաստանի մայրաքաղաքի նկատմամբ։ Կատարումներ, որոնք ապրում են մինչև օրս և փոխանցվում սերունդներին», -ասաց «Մոսկվայի տուն» կենտրոնի գլխավոր տնօրեն Վահրամ Կարապետյանը։
Կոմպոզիտորի ստեղծագործությունները կատարեցին Երիտասարդական օպերային ծրագրի մենակատարներ Ջուլիաննա Գրիգորյանը, Տիգրան Մելքոնյանը, Տիգրան Հակոբյանը, Բելլա Ամարյանը, Նավասարդ Հակոբյանը, Լուսինե Մակարյանը և այլ տաղանդավոր արտիստներ։ Համերգի հատուկ հյուրը ՌԴ-ից երգիչ և կոմպոզիտոր Նիկոլայ Ռյաբուխան էր։
Արթուր Աղաջանովն ելույթից հետո հուզիչ անակնկալ մատուցեց հանդիսատեսին և իր սիրելիին։ Բաբաջանյանի «Գեղեցկության թագուհի» երգը կատարելուց հետո երգիչը հրապարակավ ամուսնության առաջարկություն արեց ընկերուհուն, որը պատասխանեց՝ «այո»։