Հունաստանը 100 եվրո տուգանք է սահմանել Covid-ի դեմ չպատվաստված տարեց քաղաքացիների համար
ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ։ Հունաստանի իշխանությունները հունվարի 17-ին պարտադիր պատվաստում են մտցրել 60 տարեկանից բարձր բնակիչների համար, մինչդեռ պատվաստումից հրաժարվողներին տուգանքներ են սպառնում։ Ինչպես տեղեկացնում է «Արմենպրես»-ը, այս մասին գրում է «Ինտերֆաքս»-ը՝ հղում անելով The Guardian-ին։
Հրատարակության տվյալներով՝ հունվարի ընթացքում տուգանքը կկազմի 50 եվրո, իսկ հաջորդ ամիսներին՝ 100 եվրո։
«Տարիքային գործոնը կարևոր է՝ հաշվի առնելով դրա ազդեցությունը հանրային առողջապահական ծառայության վրա»,- նշում է Հունաստանի առողջապահության նախարար Թանոս Պլեուրիսը:
Հույների մոտ երկու երրորդը ներկայումս պատվաստված է: Մահացությունների և ամենօրյա հոսպիտալացումների մակարդակը աճել է օմիկրոն տարբերակի տարածումից հետո, թեև վերակենդանացման բաժանմունքների ծանրաբեռնվածությունը փոքր-ինչ նվազել է։
Անցյալ տարի Հունաստանը պարտադիր պատվաստումներ է սահմանել բուժաշխատողների համար։ Փետրվարի 1-ից պատվաստման վկայականը ուժի մեջ կլինի յոթ ամիս, որից հետո անձը պետք է ստանա երրորդ խթանիչ դեղաչափը։
Worldometer վիճակագրական պորտալի տվյալներով՝ Հունաստանում համաճարակի սկզբից ի վեր ավելի քան 1,6 միլիոն մարդ վարակվել է COVID-19-ով, մոտ 21,7 հազարը մահացել է, 1,2 միլիոնը՝ ապաքինվել։