Գեղարքունիքի մարզը նախապատրաստվում համապետական ապրիլվերջյան շաբաթօրյակին
ԳԱՎԱՌ, 19 ԱՊՐԻԼԻ, ԱՐՄԵՆՊՐԵՍ։ Գեղարքունիքի մարզպետ Կարեն Սարգսյանի հանձնարարությամբ արդեն նախապատրաստական աշխատանքներ են տարվում մարզի համայնքներում եւ պետական ու մասնավոր ընկերություններում՝ 2022 թվականի ապրիլի 30-ին կայանալիք համապետական շաբաթօրյակն արդյունավետ կազմակերպելու եւ անցկացնելու համար։ Ինչպես «Արմենպրես»-ին տեղեկացրին Գեղարքունիքի մարզպետարանի տեղեկատվության եւ հասարակայնության հետ կապերի բաժնից, մարզպետարանի ստորաբաժանումների ղեկավարների հետ անցկացրած հերթական աշխատանքային խորհրդակցության ընթացքում, ի թիվս այլ հարցերի, Կարեն Սարգսյանը ներկաների ուշադրությունը հրավիրել է 2022 թվականի ապրիլի 30-ին կայանալիք համապետական շաբաթօրյակի նախապատրաստական աշխատանքների կազմակերպմանը եւ իրականացմանը:
«Համապետական շաբաթօրյակի աշխատանքներին պետք է ընդգրկվեն մարզի բոլոր պետական կառույցները, համայնքապետարանները, տնտեսվարող սուբյեկտները, մասնավոր ընկերությունները: Անհրաժեշտ է ներգրավել բավարար տեխնիկական միջոցներ և մարդկային ներուժ, կատարել իրականացվող աշխատանքների քարտեզագրում, որպեսզի նախապես պլանավորված աշխատանքները իրականացվեն բարձր մակարդակով: Շատ կարևոր է, որ շաբաթօրյակի ընթացքում հավաքված եւ աղբավայրեր տեղափոխված աղբը անմիջապես հողածածկվի, այլապես մաքրման աշխատանքներն անարդյունք կանցնեն՝ ստեղծելով շրջակա միջավայրի աղտոտման նոր ռիսկեր»,- նշել է մարզպետը:
Խոսրով Խլղաթյան