ԵՐԵՎԱՆ, 12 ՕԳՈՍՏՈՍԻ, ԱՐՄԵՆՊՐԵՍ: Վրաստանում կորոնավիրուսի վարակման դեպքերի կտրուկ աճի պատճառով իշխանությունները որոշել են երեք շաբաթով խիստ սահմանափակումներ մտցնել: Շաբաթ օրվանից կդադարեցվի հասարակական տրանսպորտի աշխատանքը, կկրճատվի սրճարանների և ռեստորանների  աշխատանքի ժամանակը, ինչպես նաև կարգելվեն փառատոնները: «Արմենպրես»-ի հաղորդմամբ՝ այս մասին հայտնում է «Грузия online» տեղեկատվական պորտալը՝ հղում անելով  COVID-19-ի դեմ միջգերատեսչական կոորդինացիոն խորհրդի օպերատիվ շտաբի պետ Գեորգի Գիբրաձեին:

Գիբրաձեն ասել է, որ նոր սահմանափակումներն ուժի մեջ կլինեն օգոստոսի 14-ից մինչև սեպտեմբերի 4-ը: Նոր արգելքները չեն վերաբերում միջազգային հաղորդակցությանը:

Միայն օգոստոսի 12-ին, Վրաստանում գրանցվել է կորոնավիրուսի վարակման 5128 նոր դեպք: Ընդհանուր առմամբ, համավարակի ողջ ընթացքում գրանցվել է վարակման 466 326 դեպք, մահացել է 6279 մարդ: