1000х90.jpg (78 KB)

Երևանում՝ 11:07,   29 Մարտ 2024

Թող կրթօջախը միայն ձեռքբերումներ ունենա. 112 դպրոցը խոշոր միջոցառմամբ հաջողություններ մաղթեց երկարամյա տնօրեն Սարգիս Քարամյանին

Թող կրթօջախը միայն ձեռքբերումներ ունենա. 112 դպրոցը խոշոր միջոցառմամբ  
հաջողություններ մաղթեց երկարամյա տնօրեն Սարգիս Քարամյանին

ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ: Սարգիս Քարամյանը, որը՝ որպես աշակերտ, հետո՝ որպես ուսուցիչ, այնուհետև՝ որպես տնօրեն, ավելի քան երեսուն տարի իր կյանքը կապել է Շավարշ Սիմոնյանի անվան թիվ 112 փորձարարական ավագ դպրոցի հետ, 2022-ին անցավ վաստակած հանգստի: Դպրոցի աշակերտները, ուսուցիչները, կրթության ոլորտի բազմաթիվ ներկայացուցիչներ, բարձր գնահատելով Քարամյանի ավանդը 112 դպրոցի կայացման և զարգացման գործում, նրան նվիրված միջոցառում էին կազմակերպել:

Հայ դասականների երաժշտական ստեղծագործությունների ուղեկցությամբ դպրոցի աշակերտները ժպիտով էին ընդունում բոլոր հյուրերին՝ նրանց ուղեկցելով դահլիճ:

Մինչ միջոցառման մեկնարկը «Արմենպրես»-ի թղթակցի հետ զրույցում Սարգիս Քարամյանը խոստովանեց՝ 112 դպրոցում լինել աշակերտ, ուսուցիչ, հետո՝ տնօրեն, բավականին հետաքրքիր է: «Չեմ կարող ասել, թե որ շրջանն էր ինձ համար ամենահիշվողը, ամենազգացմունքայինը, ամենապարտավորեցնողը: Երբեմն ասում եմ՝ իմ դպրոց, և շատերին թվում է, թե որպես տնօրեն եմ այդպես արտահայտվում, բայց այդպես չէ: Վեց տարի աշակերտ եմ եղել, չորս տարի՝ ուսուցիչ և 30 տարի՝ տնօրեն: Իմ ամբողջ գիտակցական կյանքը կապված է եղել 112 դպրոցի հետ»,-շեշտեց Քարամյանն ու հավելեց՝ գնում է դպրոցից, սակայն դա էլ  հարաբերական է, քանի որ իր ուժերի չափով աջակցելու է իր դպրոցին:

Նրա խոսքով՝ այն, ինչը իրենն է, պետք է լավը լինի: «Իմ ընկերը պետք է լավը լինի, հարևանը, կոլեկտիվը, իմ օջախը ևս: Ինձ համար 112 դպրոցն օջախ է, ուղղակի դիմացն ավելացված է «կրթ» բառը: Այստեղ հրաշալի կոլեկտիվ է՝ միասնական, որի շնորհիվ բազմաթիվ ծրագրեր ենք կարողանում իրականացնել: Խորհրդային տարիներից սկսած 112-ը միակ փորձարարական դպրոցն էր, որտեղ 6-ամյա ուսուցում, հոսքային ուսուցում, դասագրքերի, մեթոդական ամենօրյա փորձարարական աշխատանքներ էին արվում: Լավագույնն էինք ժամանակին, հետո  սուբյեկտիվ ու օբյեկտիվ պատճառներով ինչ-ինչ բաներ վերափոխվեցին, ինչը բնական է»,-շեշտեց Սարգիս Քարամյանը:

Քարամյանը կարևորեց այն հանգամանքը, որ շուրջ երեք տարի 112 դպրոցն աշխատում էր անհատական ուսումնական ծրագրով: Նրա խոսքով՝ Հայաստանի Հանրապետությունում առկա ավագ դպրոցներում խմբային ուսուցումն սկսվում է 12-րդ դասարանի երկրորդ կիսամյակից, սակայն, բավականին լուրջ քննարկումներ  անցկացնելով Կրթության ազգային ինստիտուտի հետ, որոշվել է՝ 112 դպրոցում 11-րդ դասարանցիները հանձնեն պետական ավարտական քննությունները և 12-րդ դասարան փոխադրվեն՝ հիմնական շեշտադրումն անելով հոսքային առարկաների վրա:

«Այս երեք տարվա փորձը ցույց է տալիս, որ փայլուն արդյունք ունենք: 102 աշակերտից 47-ը ընդունվել է բարձրագույն ուսումնական հաստատություն առանց կրկնուսույցի,  որից 17-ը՝ անվճար: Կուզեի, որ 102-ից 102-ն էլ ընդունվեին անվճար համակարգ: Ավագ դպրոցի առաքելությունը դա է»,-նշեց նա:

Աշակերտներին գիտելիքներ փոխանցելուց զատ Սարգիս Քարամյանը կարևորում է  մարդկային դրական հատնակնիշների ձևավորումը: Նա ընդգծեց՝ ավագ դպրոցում սովորում են տարբեր դաստիարակությամբ, կրթական տարբեր մակարդակով ու նպատակներով աշակերտներ: Դպրոցի առաջնահերթ խնդիրներից է դասարանական կոլեկտիվ ձևավորելը, որ աշակերտները ոչ թե միմյանց մեջ մրցակիցների տեսնեն, ընկերների, որոնք մաքուր փոխհարաբերություններ ունեն:

Դպրոցում հաճախ են տարաբնույթ միջոցառումներ կազմակերպում, այցելություններ նախաձեռնում թանգարաններ, օպերա, թատրոններ, այլ մշակութային հաստատություններ, մշակութային հուշարձանների տարածքներ: Դրա համար գումար չեն հավաքում. ֆինանսական ծախսերը հոգում են դպրոցի բարեկամ ծնողները: Այդ ամենը նպաստում է  լավ մարդ ձևավորելուն:

Քարամյանը շեշտեց՝ հեռանում է դպրոցից, բայց միշտ պատրաստ է աջակցելու իր կրթօջախին: «Դպրոցն ինձ համար սրբավայր է: Գնում եմ, բայց ցանկանում եմ, որ 112-ը բառի բուն իմաստով լինի կրթօջախ: Ամեն ինչ ունի սկիզբ, ընթացք և ավարտ: Նպատակահարմար կգտնեն, կարտահայտեմ իմ կարծիքը, խորհուրդ տալ չեմ սիրում, չեն ցանկանա, թող հաջողություն, նոր ձեռքբերումներ, բարի երթ լինի, թող դպրոցը լավագույններից լավագույնը դառնա»,-եզրափակեց Սարգիս Քարամյանը:

Դպրոցի ուսուցչուհի Լիլիթ Շիրինյանը, որը երկար տարիներ աշախատում է Սարգիս Քարամյանի հետ, նշեց՝ վերջինս մարդկային բարձր հատկանիշների տեր մարդ է, ուսուցիչ և տնօրեն: «Նա հավասարապես  ուշադիր է եղել թե՛ աշակերտների, թե՛ ուսուցիչների, թե՛ դպրոցի այլ աշխատակիցների նկատմամբ: Քարամյանը կարողանում էր խրախուսել բոլորին, քաջալերել: Նա կազմակերպչական մեծ ջիղ ունի, ինչը շատ կարևոր է: Քարամյանի շնորհիվ դպրոցում մշտապես հետաքրքիր միջոցառումներ են անցկացվել, որոնց բոլորը սիրով են մասնակցել»,-ընդգծեց նա:

Շիրինյանը կարևորց նաև այն, որ Քարամյանի ջանքերով վերանորոգվել է դպրոցը, այգին, կաբինետներն ապահովվել են անհրաժեշտ պարագաներով: «Նա մեծահոգի է բոլորի նկատմամբ: Ցավով եմ մտածում, որ հրաժեշտ ենք տալիս պարոն Քարամյանին, քանի որ նրա շնորհիվ նվաճումներ ենք ունեցել՝ աշակերտները հաղթանակներ են գրանցել տարբեր օլիմպիադաներում,  ընդունվել բարձրագույն ուսումնական հաստատություններ, իսկ ուսուցիչները խրախուսվել են»,-նշեց Շիրինյանը:

Միջոցառմանը, որին մասնակցում էին դպրոցի սաները, հնչեցին երաժշտական կատարումներ, ասմունք, երգ ու պար, երախտագիտության ու մաղթանքի ջերմ խոսքեր՝ նվիրված վաստակաշատ ու սիրված տնօրենին:

Անժելա Համբարձումյան


Բաժանորդագրվեք մեր ալիքին Telegram-ում






youtube

AIM banner Website Ad Banner.jpg (235 KB)

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]