ԵՐԵՎԱՆ, 20 ՄԱՅԻՍԻ, ԱՐՄԵՆՊՐԵՍ: Կայացել է «Իրական և վիրտուալ միջավայրերի թվային միացում» (DEvision) նախագծի պաշտոնական ներկայացումը՝ առցանց ձևաչափով, որին մասնակցել են Ավստրիական զարգացման գործակալության հայաստանյան գրասենյակի, Զալցբուրգի համալսարանի, Ճարտարապետության և շինարարության Հայաստանի ազգային համալսարանի (ՃՇՀԱՀ), Երևանի պետական համալսարանի, Ղրղզստանի շինարարության, տրանսպորտի և ճարտարապետության պետական համալսարանի ներկայացուցիչները և շահագրգիռ այլ կազմակերպությունների ներկայացուցիչներ։

Ինչպես «Արմենպրես»-ին տեղեկացրեց ՃՇՀԱՀ-ի մամուլի քարտուղար Ժասմին Վիլյանը, «Իրական և վիրտուալ միջավայրերի թվային միացում» (DEvision) նախագիծը մեկնարկել է  2022թ․ մարտի մեկից, որը Կրթության և հետազոտությունների զարգացման ավստրիական գործընկերային ծրագրի (APPEAR) շրջանակներում համաֆինանսավորվում է Ավստրիական զարգացման գործակալության կողմից։

«DEvision նախագիծը համատեղ համալսարանական նախաձեռնություն է, որին մասնակցում են Զալցբուրգի համալսարանը, Ճարտարապետության և շինարարության Հայաստանի ազգային համալսարնթը, Երևանի պետական համալսարանը և Ղրղզստանի շինարարութթան, տրանսպորտի և ճարտարապետության պետական համալսարանը։ Նախագծի համակարգումն իրականացվում է Զալցբուրգի համալսարանի կողմից։

DEvision նախագիծը նպատակ ունի ինտեգրել աշխարհատարածական առցանց և հիբրիդային ուսուցման մի շարք դասընթացներ՝ գործընկեր բուհերի բակալավրի և մագիստրոսական մակարդակի ուսումնական ծրագրերում: Նախաձեռնությունն իրականացվում է Թվային Երկիր տեսլականի և թվային փոխակերպման գաղափարների համատեքստում, որոնք ազդում են հասարակությունների, տնտեսությունների և շրջակա միջավայրի վրա»,- ասվում է հաղորդագրության մեջ:

Ըստ աղբյուրի՝ այս նախաձեռնությանը ՃՇՀԱՀ-ի մասնակցությունը պայմանավորված է Ավստրիայի և Ղրղզստանի գործընկերների հետ ակադեմիական համագործակցության ընդլայնմամբ և ուսանողների ու պրոֆեսորադասախոսական կազմի երկարաժամկետ փոխանակումներով՝ նպատակ ունենալով աջակցել նորարարությանը և բարելավել կրթության որակը «Թվային Երկիր» հայեցակարգի շրջանակներում: Հիմնական նպատակներից մեկը աշխարհատարածական կարողությունների ընդլայնումն է բոլոր այն դասընթացներում, որտեղ «տեղադրությունը կարևորվում է»:

Նշվում է, որ այս նախագծում մշակվելիք դասընթացները ինտեգրվելու են բակալավրիատի և մագիստրատուրայի կրթական ծրագրերում։ Երեք դասընթաց մշակվելու և ինտեգրվելու է «Գեոդեզիա և կադաստր» բակալավրիատի ծրագրում, երկու դասընթաց՝ մագիստրոսական ծրագրում: Մշակված դասընթացները, որպես շարունակական կրթություն, կարճաժամկետ վերապատրաստման դասընթացների միջոցով կառաջարկվեն նաև սոցիալական գործընկերներին և կարող են հանգեցնել մասնագիտական հավաստագրման։ Լինելով  ուսուցման բաց ռեսուրսներ՝ այդ դասընթացները կնպաստեն DEvision նախագծի հետ առնչություն չունեցողների աշխարհատարածական կարողությունների զարգացմանը։