Պատմության թանգարանի ուժը կցուցադրվի պատմական զենքերով
ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ: 2022 թ. Թանգարանների միջազգային օրվա խորագիրն է «Թանգարանների ուժը», որն առաջարկում է բացահայտել թանգարանների ներուժը երեք առանցքային միտումների համատեքստում՝ կայուն զարգացում, նորարարական-տեխնոլոգիական հասանելիություն և շարունակական կրթություն՝ որպես կարևորագույն գործոններ համայնքների զարգացման և քաղաքացիական հասարակության ձևավորման շուրջ: «Թանգարանների գիշեր» համաեվրոպական միջոցառումը այս տարի տեղի կունենա մայիսի 21-ին, այսինքն՝ այսօր: Այս առիթով «Արմենպրես»-ը զրուցել է Հայաստանի պատմության թանգարանի տնօրեն Դավիթ Պողոսյանի հետ:
-Ի՞նչ ցուցադրություն եք պատրաստել Պատմության թանգարանի այցելուների համար:
-Նախ նշեմ, որ արդեն երկար ժամանակ մեզանում թանգարանների միջազգային օրը երբեմն համընկնում է, երբեմն մի քանի օր տարբերությամբ միացվում է համաեվրոպական թանգարանային գիշեր ակցիային, որին ամեն տարի հայաստանյան նոր թանգարաններ են միանում: Ցավոք, նախորդ տարի համավարակի պատճառով թանգարանները ստիպված էին առցանց միջոցառումներով օրը նշանավորել:
Հայաստանի պատմության թանգարանը այս տարի դեռեւս հունվարից իր միջոցառումները սկսեց մեզ համար շատ նվիրական, հոբելյանական կետից՝ ՀՀ զինված ուժերի 30-ամյակի հոբելյանական տարեթվի նշանավորումից: Այս առիթով թանգարանի շենքի դիմահայաց հատվածում բացեցինք պաստառային ցուցահանդես: Հոբելյանական միջոցառումների շրջանակում որոշեցինք ի ցույց դնել թանգարանի արժեքավոր հավաքածուներից մեկը՝ զենքերի մեր ընտրանին: Թանգարանների միջազգային օրվա խորհուրդը՝ թանգարանների ուժն է, եւ այս առումով շատ դիպուկ էր Հայոց բանակի եւ այս խորագրի համադրումը:
Զենքի հավաքածուն հանրությանը ներկայացված է որպես մեր պայքարի խորհրդանիշ, որովհետեւ պայքարը մեր էպոսից ուղեկցում է մեզ, եւ դրա խորհրդանիշը հենց զենքն է: Մենք ունենք շատ հետաքրքիր հավաքածու, որը խորհրդանշական բնույթ ունի, դրանք անվանական զենքերն են: Հանրության այսօր կցուցադրենք հնագիտական շրջանի, ազգագրական, նաեւ մեր զորավարների հուշային զենքերը:
Անձնական զենքեր, նվիրատվություններ
Ամենանշանավորը զորավար Անդրանիկին եգիպտահայերի կողմից նվիրած զենքն է, որը շատ հետաքրքիր նախապատմություն ունի: Այն բավականին շքեղ զենք է՝ իր արձանագրություններով, իր ձեւավորմամբ, որը թանգարանի ամենախորհրդանշական նմուշներից մեկն է համարվում: Նշեմ, որ այս զենքը ցուցադրված էր նաեւ 44-օրյա պատերազմի ժամանակ:
Այդ օրերին մենք մի կարճ ցուցահանդես ունեցանք զորավարների սրերի: Ցուցադրելու ենք նաեւ գեներալ Կոմանդոսի կողմից թանգարանին նվիրած հետաքրքիր մի անվանական նվեր, որը նա տվեց պատերազմի օրերին: Ինձ համար մեծ պատիվ էր գեներալից ստանալ այդ զենքը: Կցուցադրվի նաեւ Մարշալ Բաղրամյանի սուրը, որը նվիրաբերվել է մեր թանգարանին: Շատ խորհրդանշական զենքեր կան նաեւ այլ մշակույթներին պատկանող, որոնք ինչ-ինչ պայմաններում հայտնվել են հայ անվանի գործիչների մոտ, որպես նվեր, որպես խորհրդանիշ: Այստեղ կտեսնեք ճապոնական զենքեր, ֆրանսիական եւ այլն:
Այլ թանգարանների հետ համագործակցություն
Սարդարապատի հերոսամարտի հուշահամալիրից, Երեւանի պատմության թանգարանից եւ Վազգեն Սարգսյանի անվան ռազմական ինստիտուտից եւս կլինեն ցուցանմուշներ: Թանգարանային համագործակցություն կա: Կարծում եմ, որ շատ հետաքրքիր կլինի այս տարվա թանգարանային գիշեր միջոցառումը: Մենք ունենալու ենք նաեւ համերգ՝ զինվորականների մասնակցությամբ, այնպես որ սիրով կսպասենք մեր այցելուներին:
Լիանա Սարգսյան
Բաժանորդագրվեք մեր ալիքին Telegram-ում