ԳԱՎԱՌ, 23 ՄԱՅԻՍԻ, ԱՐՄԵՆՊՐԵՍ։ Մարտունի համայնքում նախօրոք հայտարարված հերթական շաբաթօրյակի արդյունքում կենցաղային  աղբի թափոններից  մաքրվել է  Երեւան-Վարդենիս մայրուղու՝ Արծվանիստից մինչեւ Երանոս ընկած անտառամերձ եւ գետափնյա հատվածները: Ինչպես «Արմենպրես»-ին տեղեկացրին Մարտունու համայնքապետարանի աշխատակազմից,  շաբաթօրյակին մասնակցել են շուրջ 300 մարդ, ովքեր ներկայացնում էին  համայնքապետարանի աշխատակազմը, բնակավայրերի վարչական գրասենյակները,  Գեղարքունիքի տարածաշրջանային պետական  եւ  Մարտունու պետական բժշկական քոլեջը։

«Շաբաթօրյակները կկազմակերպվեն հաճախակի եւ անհրաժեշտության դեպքում։ Շրջակա միջավայրի մաքրության ապահովումը գտնվում է թե՛ Գեղարքունիքի մարզպետարանի, թե՛ մեր ամենօրյա ուշադրության կենտրոնում, երկու կառույցների մշտական համագործակցության ներքո։ Մարտունի համայնքում շաբաթօրյակի աշխատանքները կազմակերպեցին Գեղարքունիքի մարզպետարանի գլխավոր քարտուղար Սեւակ Խլղաթյանը, ԿՄՍ վարչության կրթության բաժնի պետ Համբարձում Սաֆարյանը, Մարտունի համայնքի ղեկավարի առաջին տեղակալ Վահագն Դավթյանը, բնակավայրերի վարչական ղեկավարները, քոլեջների տնօրեններ Յուրա Սուքիասյանը եւ Տարոն Արշակյանը: Շաբաթօրյակի արդյունքում կենցաղային աղբի թափոններից մաքրվել են մեր համայնքի տարածքով անցնող Վարդենիս-Երեւան միջպետական ճանապարհին հարող անտառամերձ տարածքները, գետաբերանները, իսկ հավաքված աղբը տեղափոխվել է աղբավայրեր եւ հողածածկվել։ Շաբաթօրյակի աշխատանքներում ընդգրկված էր 7 միավոր տեխնիկա»,-ներկայացրեց Մարտունի համայնքի ղեկավար Հովհաննես Հովեյանը :

Խոսրով Խլղաթյան