Ժամանակը Երևանում՝ 11:07:36,   18 Օգոստոս 2022

Գլովոն քաղաքի ցանկացած կետից 30 րոպեում ձեզ կհասցնի սնունդ, դեղ, անգամ մոռացված բանալի. համահիմնադիրը՝ ընկերության մասին

Գլովոն քաղաքի ցանկացած կետից 30 րոպեում ձեզ կհասցնի սնունդ, դեղ, անգամ 
մոռացված բանալի. համահիմնադիրը՝ ընկերության մասին

ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: Առցանց գնումների առաքում իրականացնող առաջատար «Գլովո» ընկերության հաջողության բանալին հիանալի սպասարկումն է. քաղաքի ցանկացած կետից ցանկացած ժամի ընդամենը մինչև 30 րոպեում «Գլովո»-ն ձեզ կառաքի սնունդ, դեղ, տեխնիկա, անգամ աշխատավայրում մոռացված ձեր բանալին: Ընկերության առաջարկների, առավելությունների և Հայաստանում գործունեության մասին «Արմենպրես»-ը զրուցել է Հայաստանում գտնվող «Գլովո»-ի համահիմնադիր Սաշա Միշոդի հետ:

-Պարոն Միշոդ, հետաքրքիր կլինի լսել «Գլովո»-ի պատմությունը հենց Ձեզնից, ե՞րբ և որտե՞ղից է սկսվել ընկերության պատմությունը:

-Պատմությունը սկսվել է 2015 թվականի սկզբին, ընդամենը 7 տարի առաջ Իսպանիայում՝ Բարսելոնայում: Այսպիսով` մեր գլխավոր գրասենյակը հիմնադրել ենք Իսպանիայում: Հիմնադիրներն ենք ևս և Օսկար Պիերը: Հավելվածի առաջին տարբերակը գործարկեցինք Բարսելոնայում 2015 թվականի մարտին: Այդ ժամանակից ի վեր  մենք շատ արագ աճեցինք,  ընդլայնվեցինք Եվրոպայում՝ Իտալիայում, Պորտուգալիայում: Մենք տեղափոխվել ենք նաև Արևելյան Եվրոպա՝ Լեհաստան, Բալկանյան տարածաշրջան և, իհարկե, այս տարածաշրջան՝ Վրաստան, Ղազախստան, Ղրղզստան և վերջերս նաև՝ Հայաստան: Հայաստանում մեր աշխատանքը սկսեցինք շուրջ 6 ամիս առաջ: Մենք այսօր գործում ենք աշխարհի 25 երկրում, այդ թվում՝  աֆրիկյան 7 երկրում, գործունեություն ենք ծավալում 1500 քաղաքում, ունենք 3500 աշխատող, 75000 առաքիչներ: Մենք ունենք 150 000 գործընկեր, դրանք խանութներ են, ռեստորաններ, մանրածախ վաճառողներ, որոնք վաճառքն իրականացնում են մեր հարթակում: Այսպիսով` ունենք 8 միլիոն ակտիվ հաճախորդ, նրանք այն մարդիկ են, որոնք այդ խանութներից, ռեստորաններից առցանց գնում են կատարում: Այսպիսով, մենք կարճ ժամանակում շատ արագ  աճել, զարգացել ենք և իսկապես ուրախ ենք, որ այստեղ ենք՝ Հայաստանում:

-Ձեր ընկերությունն այսպիսով գործում է աշխարհի 25 երկրում, այս տարի ընդլայնվելու պլաններ ունե՞ք, եթե այո, ապա ո՞ր երկրներում:

-Այս պահին կոնկրետ երկիր չենք առանձնացրել, մենք դիտարկում ենք երկու տարածաշրջան՝ և՛ այս տարածաշրջանը, և՛ Աֆրիկան: Այս երկու տարածաշրջաններում մենք ընդլայնվում ենք՝ փնտրելով հնարավոր երկրներ: Մենք նաև ընդլայնում ենք մեր գործունեությունն այն երկրներում, որտեղ գործում ենք: Լավ օրինակ՝ մենք գործում ենք Վրաստանի և Հայաստանի երկու քաղաքներում, բայց նպատակը դրանք ընդլայնելն ու այստեղ նոր քաղաքներում ևս գործունեություն սկսելն է: Այսպիսով` այն երկրներում, որտեղ գործում ենք, կընդլայնվենք բազմաթիվ քաղաքներում՝ ավելի շատ հաճախորդներ, ավելի շատ ռեստորաններ և խանութներ ներգրավելով:

-«Գլովո»-ն միայն սննդի առաքման ընկերություն չէ: Ի՞նչ լրացուցիչ ծառայություններ եք առաջարկում սպառողներին:

-Մենք առաջին իսկ օրվանից բազմաբնույթ ենք, ինչը մեզ մրցակիցներից տարբեր է դարձնում: Եթե մեր մրցակիցները կկենտրոնանային միայն ռեստորանային սննդի վրա, ապա մենք առաջին իսկ օրից՝ 2015 թվականի մարտից, միշտ եղել ենք բազմաբնույթ: Այսպիսով, ռեստորանները մեր ամենամեծ ճյուղն են, մթերային խանութները ծավալով երկրորդն են: Մենք աշխատում ենք թե մեծ, թե փոքր սուպերմարկետների հետ, մեծ ցանցերի հետ, մասնագիտացված խանութների հետ, օրինակ՝ գինու խանութներ, պանրի խանութներ, էլեկտրոնիկայի խանութներ: Աշխատում ենք նաև դեղատների հետ: Հավելվածում նաև ավելի ու ավելի կարևոր են դառնում նորաձև հագուստները: Այսպիսով` մեր հաճախորդները գիտեն, որ ցանկացած ապրանք կհասցնենք իրենց 30 րոպեում նույն գնով, ինչ գին կվճարեին, եթե իրենք անեին դա:

-«Գլովո»-ն որքա՞ն ժամանակ է, ինչ գործում է Հայաստանում, ի՞նչ է այն առաջարկում սպառողներին:

-Մենք սկսել ենք Հայաստանում գործել անցյալ տարվա սեպտեմբերից: Կարծում եմ, որ մենք իսկապես լավ որակի ծառայություն ենք բերել: Շատ ծիծաղելի էր. երբ մենք սկսեցինք մեր աշխատանքը Հայաստանում, հաճախորդներն իրենց լանչը պատվիրում էին առավոտյան ժամը 10:00-ին, և, իհարկե, մենք 30 րոպեում հասնում էինք՝ շաուրմայով կամ լանչի այլ ուտեստով, և նրանք ասում էին՝ դեռ շատ վաղ էր, քանի որ նրանք սովոր էին առաքման համար սպասել 2 կամ 3 ժամ: Այսպիսով, ես կարծում եմ, որ առաջինը իսկապես լավ ծառայությունն է: Մեր հաճախորդները կարող են նաև ամեն պահի տեսնել, թե որտեղ է առաքումը, երբ նրանք պատվեր են կատարում, նրանք գիտեն, թե երբ է առաքիչը վերցնում ապրանքը խանութից, քաղաքի որ մասում է և թե երբ կհասնի: Կարծում եմ՝ դա շատ կարևոր է, գուցե դուք ինչ-որ բան եք անում և ցանկանում եք ճշգրիտ իմանալ, թե երբ կհասնի ապրանքը: Այսպիսով, ծառայության որակը ամենաառաջինն է: Երկրորդը, կարծում եմ, լավ կոնտենտ, առաջարկ ունենալն է, այսինքն` ունենալ ոչ միայն լայն ցանց, այլ՝ այն հիանալի ռեստորանները, որոնք ձեզ դուր են գալիս կամ ձեր նախընտրելի սուպերմարկետները, խանութները: Այսպիսով, ես կարծում եմ, որ լավագույն գործընկերները և հիանալի սպասարկումը մեր հաջողության բանալին են:

-Տեսակետ կա, որ յուրաքանչյուր հաջողակ մարդ, հաջողակ բիզնես ունի հաջողության իր գաղտնիքը: Ի՞նչ եք կարծում՝ ո՞րն է հաջողության ձեր գաղտնիքը:

- Կարծում եմ՝ շատ տարբեր երկրներում, շատ տարբեր մշակույթներում շատ տեղական լինելը: Երբ մենք սկսում ենք գործունեություն որևէ երկրում, մենք հավաքում ենք տեղական թիմ՝ վարելու բիզնեսը: Նույնն արվում է և Հայաստանում: Այստեղ թիմում 15 հոգի ունենք, սակայն ընդլայնում ենք թիմը: Նրանք քաջատեղյակ են տեղի քաղաքներին, կարիքներին: Այսպիսով, ես կարծում եմ, որ դա մեր հաջողության բանալին է: Տեղական թիմն է վարում բիզնեսը: Մեր բիզնեսն այստեղ՝ Հայաստանում, շատ տարբեր է այլ երկրներից, քանի որ թիմը նույնականացված է: Եվ ես կարծում եմ, որ սա մեր հաջողության բանալին է:

-Ո՞րն է «Գլովո»-ի հիմնական տարբերությունը առաքման այլ ծառայություններից:

-Կարծում եմ՝ բազմաբնույթ լինելը։ Մեր տեսլականը ձեր քաղաքում բոլորին ցանկացած բան հեշտ հասանելի դարձնելն է: Սնունդ պատվիրելը և առաքմամբ ստանալը հիանալի է: Բայց, կարծում եմ, ապշեցուցիչ է, երբ գիտես, որ դու արտակարգ իրավիճակում ես, գիշերը ժամը 11:00-ին երեխան լաց է լինում, իսկ դու տակդիր չունես, ապա կարող ես պատվիրել Glovo-ով, և մենք կհասցնենք քեզ տակդիրներ 30 րոպեից: Դուք կզարմանաք, եթե իմանաք, թե մենք որքան բանալի ենք առաքում քաղաքում: Եթե դուք տուն եք հասել, բայց բանալիները մոռացել եք աշխատավայրում, ապա մենք կվերցնենք դրանք և կհասցնենք ձեզ կամ այն երեխաներին, որոնց ծնողներն աշխատավայրում են, սակայն իրենք դպրոցից տուն են վերադառանում: Այսպիսով, մենք փրկիչ ենք արտակարգ իրավիճակներում, կարիքի դեպքում, ինչը, կարծում եմ, հիանալի է: Եվ դա հուզական կապ է ստեղծում մեր հաճախորդների հետ: Այսպիսով, մենք պարզապես սննդի առաքման հավելված չենք:

-«Գլովո»-ն Հայաստանում հասանելի է երկու քաղաքում՝ Երևանում և Գյումրիում։ Ընդլայնման ի՞նչ ռազմավարություն ունեք, կա՞ն ընդլայնվելու ծրագրեր և ո՞ր քաղաքներում։

-Սովորաբար, և Հայաստանը բացառություն չէ, մենք գործում ենք ամենամեծ կոսմոպոլիտ քաղաքներում, որտեղ կան հիանալի ռեստորաններ և խանութներ, հաճախորդները թվային տեխնոլոգիաներից շատ են օգտվում, հետո մենք ընդլայնվում ենք դեպի ամենամեծ քաղաքներ՝ կախված աշխարհագրական դիրքից:  Մեզ դուր են գալիս համալսարանական քաղաքները, որտեղ կան երիտասարդներ, որոնք կիրառում են թվային տեխնոլոգիաներ: Այսպիսով, մենք այժմ երկու քաղաքում ենք, ընդլայնվում ենք Հայաստանի այլ քաղաքներում: Ես հիմա քաղաքների հստակ ցուցակը չունեմ, բայց, ընդհանուր առմամբ մենք առաջին հերթին կսկսենք ամենամեծ բնակչություն ունեցող քաղաքներից:

-Կցանկանայի՞ք որևէ այլ թեմայից խոսել, որի մասին գուցե չեմ հարցրել:

-Ինչպես նշեցի՝ մենք սիրում ենք քաղաքների մաս լինել: Մենք արդեն  300-ից ավելի առաքիչներ ունենք, այսինքն՝ 300 մարդիկ, ովքեր աշխատում են հարթակում, եկամուտ են ստանում, մինչև հաջորդ տարի թիվը կհասնի հազարի: Մենք արդեն ավելի քան 400 գործընկեր ունենք, որոնք վաճառք են իրականացնում հարթակում: Նրանց 90 տոկոսը փոքր բիզնեսներ են, սա նույնպես կարևոր է: Մենք աշխատում ենք հանրային կառավարման մարմինների հետ, փորձում ենք լինել էկոհամակարգի մաս, հիմնում ենք տեղական ընկերություններ, ունենք մի քանի տեղական թիմեր: Այսպիսով` մենք փորձում ենք, ըստ էության, հնարավորինս շատ լինել Հայաստանի այն քաղաքների մաս, որտեղ գործում ենք: Մենք նաև ունենք առաքիչի անվտանգության ուսուցում, որը չափազանց կարևոր է: Դուք գիտեք, որ նրանք մոտոցիկլետներով և հեծանիվներով են առաքում անում, և ես կարծում եմ, որ այդ ուսուցումը շատ կարևոր է: Այսպիսով, մենք նոր ենք սկսում: Մենք ունենք լավ օրինակներ հարևան երկրներում, որտեղ խոշոր բիզնեսներ ունենք: Մենք Վրաստանում սկսեցինք գործել 4 տարի առաջ, և այն տասն անգամ ավելին է, քան բիզնեսը: Այսպիսով, Հայաստանը հսկայական աճ է ունենալու, և մենք տեսնում ենք, որ թիմն ապշեցուցիչ է, տեղի թիմը հիանալի է գործում, ուստի ես իսկապես ոգևորված եմ: Ես այստեղ եմ 3 օրով, բայց շատ շուտով կվերադառնամ։








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]