Կարևորը՝ խաղաղություն լինի. նորակոչիկները բարձր տրամադրությամբ են մեկնում զինվորական ծառայության
ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: ՀՀ զինված ուժերում սկսվել է 2022 թ. ամառային զորակոչը, որին նորակոչիկները գալիս են մարտական բարձր տրամադրությամբ՝ առանց որևէ մտավախության և բանակային կյանքի մասին նախապաշարումների: Երիտասարդները ՊՆ հավաքակայանում կիսվել են «Արմենպրես»-ի թղթակցի հետ իրենց տպավորություններով՝ գրեթե միաբերան շեշտելով, որ առաջիկա երկու տարվա զինվորական ծառայության ընթացքում ամենագլխավորն իրենց համար խաղաղությունն ու կայունությունն է սահմաններին և ամբողջ երկրում:
Իջևանցի Մհեր Դովլաթբեկյանի համար նշանակություն չունի՝ ո՞ր զորատեսակում կամ ո՞ր զորամասում ինքը կծառայի: 18-ամյա երիտասարդը զինվորական ծառայության է գնում շատ լավ տրամադրությամբ՝ նշանակություն չտալով երկրորդական հարցերին:
«Շատ լավ տրամադրությամբ եմ գնում: Կարևորը՝ խաղաղություն լինի, թե չէ՝ ուրիշ ոչ մի բան չեմ ուզում», - «Արմենպրես»-ին հայտնեց նորակոչիկը:
Մհերի հասակակից Էրիկը Տավուշի Կողբ գյուղից է: Շփման մեջ նա ավելի ամաչկոտ էր, բայց Հայրենիքին իր պարտքը տալու վճռականությամբ չէր զիջում իր ապագա ծառայակիցներին:
«Շատ լավ եմ տրամադրված: Սահմանին էլ կծառայեմ, տարբերություն չկա», - «Արմենպրես»-ի հետ զրույցում նշեց նորակոչիկ Էրիկ Սիմոնյանը:
Ի դեպ, ժամկետային զինծառայությունից հետո Էրիկը ցանկանում է ծառայել սահմանապահ զորքերում՝ որպես պայմանագրային:
Նորակոչիկ Խաչիկ Ոսկանյանն էլ ապագա ծրագրավորող է՝ Երևանից: Զինվորական ծառայության դժվարություններից նա չի վախենում՝ ասելով, որ դրանք զինվորի և տղամարդու համար են: Կարծում է, որ ծառայության երկու տարին շուտ կանցնի: Խաչիկի ծնողներն ու հարազատները ուրախությամբ են իրենց զավակին ճանապարհել դեպի հավաքակայան և դեպի նոր՝ բանակային կյանք: Իրեն և իր հասակակիցներին նորակոչիկը միայն մի բան է մաղթում՝ «լավ ծառայել և հասնել իրենց ծնողներին ու ընկերներին»:
«Արմենպրես»-ի հնարավորություն չունեցավ հետևելու Խաչիկի, Էրիկի, Մհերի և մյուս լուսավոր երիտասարդների վիճակահանության հետագա ընթացքին, թե ո՞ր զորամաս նրանք «ընկան», հանրապետության ո՞ր հատվածում են այս ժամերին նրանց դիմավորում իրենց ապագա ծառայակիցները և ո՞ր զորքերում են նրանք ծառայելու առաջիկա երկու տարիներին, բայց ամեն դեպքում նույնպես բոլոր զորակոչիկներին մաղթում է անփորձանք և բարի ծառայություն, որպեսզի նրանցից յուրաքանչյուրը երկու տարի անց ողջ և առողջ վերադառնա իր ծնողներին ու հարազատներին: Վստահ ենք, որ այդ խաղաղությունը, որի մասին խոսում էին մեր հերոսները, հենց իրենք՝ Հայոց բանակի զինվորներն են ապահովելու:
Լրագրող՝ Արամ Սարգսյան
Լուսանկարիչ՝ Հայկ Մանուկյան
Բաժանորդագրվեք մեր ալիքին Telegram-ում