368.15
Միխայել Ռոթը հայտնում է, որ հայ-ադրբեջանական բանակցությունները կշարունակվեն նաև Գերմանիայի և Ֆրանսիայի մասնակցությամբ
1 րոպեի ընթերցում
ԵՐԵՎԱՆ, 7 ՀՈՒՆԻՍԻ, ԱՐՄԵՆՊՐԵՍ: Գերմանիայի Բունդեսթագի արտաքին հարաբերությունների հանձնաժողովի նախագահ Միխայել Ռոթը հայտնում է, որ Հայաստանի և Ադրբեջանի միջև բանակցությունները կշարունակվեն ամենատարբեր ձևաչափերով՝ նաև ԵՄ-ի, Ֆրանսիայի ու Գերմանիայի մասնակցությամբ և ընդգրկմամբ:
«Արմենպրես»-ի փոխանցմամբ՝ Ռոթն այս մասին ասաց Երևանում կայացած ասուլիսում:
«Առաջիկայում Վաշինգտոնում տեղի կունենան ինտենսիվ բանակցություններ: Այդ բանակցությունները կշարունակվեն ամենատարբեր ձևաչափերով նաև ԵՄ-ի, Ֆրանսիայի ու Գերմանիայի մասնակցությամբ և ընդգրկմամբ»,-ասաց Ռոթը:
Անդրադառնալով վերջերս Քիշնևում կայացած հնգակողմ հանդիպմանը Գերմանիայի կանցլեր Օլաֆ Շոլցի մասնակցության վերաբերյալ հարցին՝ նա ասաց, որ գլխավոր դերակատարը ԵՄ-ն է, ամբողջ գործավարությունն իրականացնում է Եվրամիությունը՝ հանձինս ԵԽ նախագահ Շառլ Միշելի:
«Մենք՝ որպես միջին մեծության երկու եվրոպական երկրներ, պարզապես մաս ենք կազմում Եվրամիության այդ մեծ հանձնառությանը: Եվ կուզենայինք մեր համեստ նպաստը բերել խաղաղության գործընթացին»,-ասաց նա:
Ռոթը նաև նկատեց, որ Գերմանիայի կանցլերի մասնակցությունն այդ գործընթացին բավականին դրական արձագանքներ է գտել հայ հանրության շրջանում:
Բաժանորդագրվեք մեր ալիքին Telegram-ում