ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ: Երեխաների տաղանդների բացահայտմամբ չքավոր ընտանիքներին օգնելու նպատակով Ռուանդայի մայրաքաղաք Կիգալիում հիմնադրված Morioxkids հիմնադրամի փոքրիկ պարողների խումբն արդեն մի քանի շաբաթ է՝ գրավել է տարբեր սոցցանցերի հայկական տիրույթը: Երեխաները պարում են հայերեն երգերի տակ, երբեմն անգամ ձայնակցում կրկներգերը: Տեսանյութերը վիրուսային տարածում են ստանում և «գերված սրտերի» մասին հազարավոր մեկնաբանություններ հեղեղում համացանցը:

«Առայժմ մենք պարում և երգում ենք որպես մեր հիմնական գործունեություն: Մեր առաքելությունն է օգնել չքավոր ընտանիքների երեխաներին իրենց տաղանդի միջոցով հասնելու ավելի լավ կյանքի»,-«Արմենպրես»-ի հետ բացառիկ զրույցում պատմել են խմբի հիմնադիրներ Կայիտարե Ստեվենը և Շեմա Բլեյզը:

Նրանք նշում են, որ տարբեր երկրներից օրեցօր ավելացող հետևորդների թիվը նրանց ոգեշնչում է՝ ձգտել ավելիին, ամեն օր սեր ու ուրախություն պարգևել ավելի շատ մարդկանց: Նրանք երջանկանում են՝ հետադարձ նամակներ, գովեստի խոսքեր ստանալով՝ ձգտելով իրենց հոբբին վերածել մասնագիտության՝ երաժշտության, դերասանության և սպորտի միջոցով հանգանակություններ ներգրավել՝ առաջնային կարիքների համար:

View this post on Instagram

A post shared by Moriox Kids Foundation (@morioxkids)

Կայիտարե Ստեվենը և Շեմա Բլեյզը պարզաբանում են՝ հիմնադրամի նպատակներն են օգնել աղքատ ընտանիքների երեխաներին կապ հաստատել աշխարհի հետ: «Մեր հիմնական նշանակետը կրթությունն է. մենք ցանկանում ենք տեսնել այս երեխաներին լավ դպրոցներում, ունենալով հովանավորներ, ովքեր հոգ են տանում նրանց մասին, որպեսզի պարը, երգը և այլ զբաղմունքները ոչ միայն հաճույք պատճառեն, այլ նաև դարձնեն նրանց կյանքը ավելի լավը: Ցանկանում ենք, որ մի օր մենք ունենանք մեր դպրոցը (Moriox դպրոց), որը օգնի ավելի շատ տաղանդավոր երեխաների»,-ընդգծում են նրանք:

Հիմնադրամի անվանումը ևս նրանց համար խորհուրդ ունի: Հիմնադիրները հայ հետևորդների համար ներկայացրել են, թե ինչ է այն նշանակում.

M-ը (mighty)` հզոր, ձեր ներքին ուժն է,

O-ն (objective)` օբյեկտիվ, միշտ անաչառ,

R-ն (rich)` հարստություն, այլոց սիրո մեջ,

I-ը (intellect)` ինտելեկտ, գիտելիքի նկատմամբ ձգտումը,

O-ն (openness)՝ անկեղծություն, այն թարմացնող է,

X-ը՝ մարդու առեղծվածային կողմը:

«Հայերեն երգերը հաճելի են, շատ ռիթմիկ, որը մղում է ավելի ու ավելի սիրել դրանք: Իսկ հայերի կողմից մեր նկատմամբ ջերմությունն ու սերը ստիպեցին զգալ, որ Հայաստանը մեր տունն է: Հայ արտիստները միշտ ոգևորվում են՝ տեսնելով մեր պարերը իրենց երգերի ներքո։ Մենք չենք կարող համապատասխան խոսքերով բնորոշել այն սերը, որ ունենք հայկական երաժշտության հանդեպ: Մենք շնորհակալ ենք, որ այսքան սեր ստացանք Հայաստանից, որը մեզ թևեր է տալիս, մղում շարունակելու լինել ավելի լավը: Մենք սիրում ենք Հայաստանը, հուսով ենք, որ մի օր հնարավորություն կունենանք այցելելու երկիր և հանդիպելու հայ ժողովրդին»,-խմբի երեխաների ցանկությունն են փոխանցում հիմնադիրները:

Հիմնադրամը Morioxkids անվանումով էջեր ունի Instagram-ում՝ 105 հազար հետևորդով, youtube-ում՝ 132 հազար, facebook-ում` 10 հազար, tiktok-ում՝ 65 հազար: