Երևանում՝ 11:07,   19 Մայիս 2024

Ժամանակակից արվեստի տարբեր դրսևորումները՝ մեկ հարկի տակ. «ArtKvartal»-ը ցուցահանդեսով և համերգով նշեց տարեդարձը

Ժամանակակից արվեստի տարբեր դրսևորումները՝ մեկ հարկի տակ. «ArtKvartal»-ը 
ցուցահանդեսով և համերգով նշեց տարեդարձը

ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ։ Ավելի քան երեք տարի «ArtKvartal»-ն իր շուրջ է համախմբել էնտուզիաստ ստեղծագործողների՝ ժամանակակից արվեստի  տարբեր ճյուղերում աշխատող նկարիչների, որոնք կարողանում են ստեղծել նորը, հետաքրքիրը, երբեմն՝ աներևակայելին ու զարմացնել թե՛ մտքի թռիչքով, թե՛ ստեղծագործական բազմազանությամբ:

«ArtKvartal»-ի ստեղծագործական թիմը, որը երբեք հանգիստ չի նստում տեղում, միշտ աշխատում է և արարում, արվեստի իրենց սիրելի կենտրոնի տարեդարձը տոնեց «In Time» խորագրով ցուցահանդեսով, որն ավելի հարստացավ «Կաթիլ» խմբի կատարումներով:

Լուսանկարները` Գևորգ Պերկուպերկյանի

«Արմենպրես»-ի թղթակցի հետ զրույցում երիտասարդ նկարիչ, «ArtKvartal»-ի համահիմնադիր Հարութ Հովհարը պատմում է՝ Պուշկին 4 հասցեի շենքը, որում «ArtKvartal»-ն է, պատմամշակութային հուշարձան է, իսկ ցուցահանդեսում ընդգրկված աշխատանքները ներկայացված են ոչ միայն ցուցասրահում, այլև շենքի մառանում: Այն կառուցվել է 1860-ական թվականներին. Երևանի ամենահին մառաններից է: Մառանում եղել է «Նոյ» և «Արարատ» գինու և կոնյակի գործարանների պահեստը և մի սենյակ, որը ծառայել է որպես լաբորատորիա: 

GEV_1386.jpg (866 KB)

Հարութ Հովհարի խոսքով՝ արվեստագետները ոչ միայն ստեղծագործում, այլև ապրում են  «ArtKvartal»-ում, որտեղ նաև «Բաբելոն» թատրոնն է գործում:

«Երեք  տարի առաջ ես, Սերո Սողոմոնյանը, Անի Չոփուրյանը որոշեցինք համատեղ ուժերով կյանքի կոչել այս մշակութային նախագիծը:  Այստեղ ներկայացված է հայ ժամանակակից արվեստը: Իրականացվում են արվեստի պատմության դասախոսություններ, արտ թերապիաներ: Մենք անդադար աշխատում ենք մշակույթի տարբեր ուղղություններով և ամիսը երկու անգամ ցուցադրություններ ենք կազմակերպում»,-նշում է նկարիչն ու հավելում՝  իրենք առաջնորդվում են հետևյալ սկզբունքով՝ իրավունք ունեն չօգնել ինչ-որ մեկին, ինչ-որ մեկին խանգարելու իրավունք ևս չունեն:

Տոնական «In Time» ցուցահանդեսում ընդգրկված են տասնմեկ նկարչի աշխատանքներ՝ ինստալյացիաներ, լուսանկարներ, քանդակներ և այլն: Եթե մասնագետ չեք ու փորձում եք հասկանալ, թե ինչ է ասել հեղինակը, տարբեր պատասխաններ կարող եք գտնել, իսկ երբ հեղինակն ինքն է մեկնաբանում իր ստեղծագործությունը, զարմացնում է խորաթափանցությամբ:

Հարութ Հովհարն ու Սմբատ Մանուկյանը ցուցադրությանը համատեղ ինստալյացիա են ներկայացրել:

«Այս աշխատանքն այն է, ինչի մասին ցանկանում է խոսել յուրաքանչյուրը: Ինձ համար սա կնոջ և տղամարդու հանդիպումն է, նրանց շփումը»,-շեշտում է Հովհարը:

Ցուցահանդեսը համակարգել է Սերո Սողոմոնյանը, որը նշում է՝ ցուցադրությունը հստակ ժանրային ուղղվածություն չունի:

GEV_1395.jpg (767 KB)

«Մեր ժամանակներում համադրելն այնքան էլ հեշտ աշխատանք չէ, մանավանդ մեր պարագայում, երբ գործ ունենք տարբեր ժանրերում, տարբեր տեխնիկաներով աշխատող արտիստների հետ, բայց  կարևոր են կոնցեպտը, էնտուզիազմը, արարելու ցանկությունը»,-ասում է նա:

Սողոմոնյանը ցուցադրությունը բնութագրում է որպես կյանքի, հոգու, հայ ժամանակակից արվեստի էվոլյուցիա: Ըստ նրա՝ տարիների ընթացքում իրենք ապացուցել են, որ հայ ժամանակակից կերպարվեստը կա, գնալով զարգանում է և մրցակցային է:

«ArtKvartal»-ի համար ավանդույթ  է դարձել իր տարեդարձները «Կաթիլ» խմբի հետ տոնելը, խումբ, որը հայկական երգերի ինքնատիպ մեկնաբանություններով գրավում է ոչ միայն հայ, այլև օտար արվեստասերների ուշադրությունը:

GEV_1486 (1).jpg (675 KB)

«Կաթիլ»-ի վոկալիստ, կիթառահար Սևադա Համբարչյանն ասում է՝ հաճախ է եկել Պուշկի 4 հասցե, երբ այդտեղ դեռ միայն Հարութ Հովհարի արվեստանոցն էր: Փոքր համերգներ են կազմակերպել տարածքում, հետո ավելի ընդլայնել են գործունեությունը:

«Հույս ունենք, որ ավելի կամրապնդվի նկարիչների, երաժիշտների, այն խմբերի միջև կապը, որոնք հենց նկարիչների հոգեբանությամբ են ստեղծագործում, այսինքն՝ անկախ են, ազատ, իրենց ստեղծագործական ուղին ունեն: Ինչպես ամեն տեղ, այնպես  էլ արվեստում կհաղթի միասնականությունը»,-հավաստիացնում է Սևադան:

«ArtKvartal»-ի տարեդարձը տոնելու էին եկել նկարիչներ, գրողներ, երաժիշտներ, մշակույթի այլ ոլորտների ներկայացուցիչներ, արվեստասերներ և պարզապես  հետաքրքրասերներ: Բոլորն անհամբերությամբ էին սպասում ցուցանմուշներն ուսումնասիրելուն և համերգն ունկնդրելուն:

GEV_1403 (1).jpg (1.27 MB)

Հյուրերից էր Հայաստանի նկարիչների միության նախագահ Սուրեն Սաֆարյանը:

«Շատ հետաքրքիր ցուցահանդես է: Այստեղ միշտ նոր մոտեցումներ, նոր գաղափարներ է հնարավոր գտնել: Շատ եմ կարևորում մեր քաղաքում «ArtKvartal»-ի տեղը, դերը, ճանաչում եմ այս գողտրիկ վայրի հիմնադիրներին, որոնք անում են ամեն ինչ, որ մեր ժամանակակից արվեստն ամուր ու հաստատուն քայլերով առաջ գնա»,-ընդգծում է Սաֆարյանն ու շնորհավորում ստեղծագործական թիմին, մաղթում, որ արվեստի օջախն ընդլայնվի, քանի որ արվեստասերը նման միջավայրում զգում է իրական արվեստն ու ժամանակը:

«ArtKvartal»-ի հիմնադիրները հավաստիացնում են՝ այն արվեստասերները, որոնք մեկ անգամ այցելում են իրենց, անպայման վերադառնում են ծանոթների, այլ արվեստասերների ու արվեստագետների ընկերակցությամբ: Հիմնադիրները չունեն աջակիցներ և չեն ցանկանում շատ բարձրաձայնել իրենց մասին: Կարծում են՝ պետությունն այժմ իրենց օգնության կարիքն ունի, ուստի պետք է անեն հնարավորը` նրա կողքին լինելու համար:

Անժելա Համբարձումյան

Լուսանկարները՝ Գևորգ Պերկուպերկյանի

 

 


Բաժանորդագրվեք մեր ալիքին Telegram-ում






youtube

AIM banner Website Ad Banner.jpg (235 KB)

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ contact@armenpress.am