1000х90.jpg (78 KB)

Երևանում՝ 11:07,   29 Մարտ 2024

Շախմատը սովորեցնում է էմոցիոնալ չլինել, աշխատասիրություն, համբերատարություն. Մարիա Գևորգյան

Շախմատը սովորեցնում է էմոցիոնալ չլինել, աշխատասիրություն, համբերատարություն. 
Մարիա Գևորգյան

ԵՐԵՎԱՆ, 29 ՄԱՐՏԻ, ԱՐՄԵՆՊՐԵՍ: Շախմատի Հայաստանի կանանց առաջնությունում արդեն երկրորդ տարին անընդմեջ երկրի չեմպիոնի տիտղոսն է նվաճում Մարիա Գևորգյանը: Մարիային հյուրընկալել էինք մեր խմբագրությունում և բավականին անկեղծ զրույցն ավելի հետաքրքրացավ շախմատային խաղատախտակի դիմաց: Չբացահայտելով «Արմենպրես»-ի տնօրեն Արամ Անանյանի և Մարիայի երկու պարտիաների արդյունքները՝ հարկ է նշել, որ խաղատախտակի շուրջ ծավալված զրույցն առավել լավ համեմել անկարելի էր:

-Ինչպե՞ս ես սկսել շախմատ խաղալ, ո՞վ է ուղղորդել:

-Շախմատ խաղալ սովորել եմ երեք տարեկանում: Պապիկս է սովորեցրել: Արդեն 7 տարեկանից սկսեցի հաճախել շախմատի պարապմունքների, իսկ 8 տարեկանում կանանց առաջին լիգայում էի խաղում: Նույնիսկ ծիծաղելի մի միջադեպ եղավ, երբ բեմի վրա էի, խաղացողներից մեկն ասաց, «Երեխային իջեցրեք բեմից», պատասխանեցին. «Երեխան այստեղ է խաղում»: Նույնիսկ այդ մրցաշարում կարողացա մեկ միավոր վերցնել: Պապիկիս հետ լուրջ չէինք խաղում, սակայն տանը շախմատը միշտ կար: Շախմատ խաղում է նաև մայրիկս:

-Արդեն երկրորդ տարին անընդմեջ Հայաստանի չեմպիոնն ես: Ի տարբերություն նախորդ տարվա, այս տարի լարվածությունը կար մինչև վերջին պահը: Ի՞նչ կասես այդ մասին:

-Անցած տարի առավել լավ էի պատրաստված և ավելի ինքնավստահ էի խաղում: Թեպետ այս տարի էլ ինքնավստահությունս տեղում էր: Սակայն անսպասելի էր, որ պարտվեցի Սիրանուշին. պատճառը վատ սկզբնախաղն էր, ամեն ինչ առավել լարվեց:

-Ո՞րն է տարբերությունը նախորդ և այս տարվա միջև:

-Կարծում եմ` այս տարի ավելի ուժեղ թիմ էր հավաքվել: Երեխաներն ավելի լավ էին խաղում, և մրցակցություն կար:

-Երկու տարի է՝ հավաքականի կազմում ես: Ինչպիսի՞ն է հավաքականը ներսից:

-Հավաքականի մյուս անդամների հետ շատ մոտ ենք: Ցավոք, անցած տարի թիմային մրցաշար չունեինք, բայց փոխարենն ունենք այս տարի, ինչն ավելի ոգևորող է:

-Մարիա, ինչի՞ց է, որ շախմատն այսքան սիրելի է Հայաստանում:

-Կարծում եմ նրանից է, որ Արոնյանը առաջխաղացում ունեցավ, նրանից, որ շախմատը որպես առարկա արդեն դպրոցներում է, նպաստում է մասսայականացմանը:

-Եվ ի՞նչ պլաններ ունես առաջիկայում:

-Հիմա պատրաստվում եմ Եվրոպայի կանանց անհատական առաջնությանը: Այն կկայանա Լատվիայի մայրաքաղաք Ռիգայում:

 

-Քիչ շեղվելով` ունես արդյո՞ք սիրելի շախմատիստ:

-Բոբի Ֆիշերը, քանի որ, եթե համեմատում ենք մյուս շախմատիստների հետ, տարբերությունը՝ խաղի որակի հետ կապված, ահռելի մեծ է: Մագնուս Կարլսենն արդեն ուրիշ ժամանակաշրջանի շախմատի է պատկանում` այն շախմատին, որտեղ կա համակարգիչը:

-Իսկ սիրելի խաղաքար:

-Թագուհին:

-Ինչի՞ վրա ես սիրում շեշտը դնել` սկզբնախաղի, թե վերջնախաղի:

-Դժվար է հստակ ասել, բայց սիրում եմ միջնախաղը:

-Շախմատը գիտությո՞ւն է, թե սպորտ:

-Համ գիտություն, համ սպորտ:

-Շախմատում խաղում եք ֆիգուրների՞, թե մարդու դեմ:

-Ավելի շատ ինքդ քո դեմ ես խաղում:

-Ինչո՞ւ շախմատից ուժեղ են հայ տղամարդիկ, իսկ Վրաստանում՝ կանայք:

-Դպրոցների տարբերության հարց է: Հայ տղամարդիկ վստահ հաղթում են վրացի կանանց:

-Ինչո՞ւ աղջիկները պետք է զբաղվեն շախմատով:

-Եթե ինչ-որ մի բան լավ ես անում, ուրեմն ինչու չզբաղվել:

-Ի՞նչ է սովորեցնում շախմատը:

-Էմոցիոնալ չլինել, պարտությունը հանգիստ ընդունել, աշխատասիրություն, համբերատարություն:

-Ի՞նչ է նշանակում ձեզ համար Հայաստանի չեմպիոն լինելը:

-Յուրաքանչյուր մարզիկի համար մեծ պատիվ է ազգային թիմում խաղալը:

-Շնորհակալություն:

Վարվառա Հայրապետյան


Բաժանորդագրվեք մեր ալիքին Telegram-ում






youtube

AIM banner Website Ad Banner.jpg (235 KB)

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]