ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ։ Թուրքիայի և Եգիպտոսի միջև փոխարտգործնախարարների մակարդակով քաղաքական քննարկումների երկրորդ փուլը տեղի կունենա Անկարայում։

Այս մասին, ինչպես հաղորդում է «Արմենպրես»-ը, հայտնում է թուրքական «Անադոլու» լրատվական գործակալությունը։ 

Քննարկումները տեղի կունենան այս տարվա սեպտեմբերի 7-8-ը Թուրքիայի արտաքին գործերի նախարարությունում։ 

Կողմերը կքննարկեն երկկողմ և տարածաշրջանային ձեւաչափով հարաբերությունների կարգավորմանն ուղղված քայլերը: 

«Հետագա քայլերը կլինեն քննարկումների երկրորդ փուլի արդյունքները վերլուծելուց հետո»,-ասվում է հայտարարության մեջ։ 

Թուրքիա-Եգիպտոս նման ձևաչափով քննարկումների առաջին փուլը տեղի է ունեցել այս տարվա մայիսի սկզբին։

Թուրքիայի արտգործնախարար Մեւլութ Չավուշօղլուն ապրիլի 15 -ին հայտարարել էր, որ համաձայնություն է ձեռք բերվել Եգիպտոսի հետ դիվանագիտական շփումները վերսկսելու վերաբերյալ: