Podcast-ՍոցUp. Դպրոցներում մասնագիտական կողմնորոշման ակումբները կաջակցեն աշխատաշուկայում հաջողված մասնագիտություն գտնելու հարցում
09:56, 7 Ապրիլ, 2022ԵՐԵՎԱՆ. 7 ԱՊՐԻԼԻ, ԱՐՄԵՆՊՐԵՍ: Սոցիալական տարաբնույթ խնդիրների վերհանումից մինչև դրանց լուծման ուղղությամբ տարվող աշխատանքներ. «Արմենպրես»-ը տալիս է ՍոցUp խորագրով փոդքաստային նոր շարքի մեկնարկը, որի շրջանակում կանդրադառնանք հասարակությանը հուզող սոցիալական հարցերին:
Հայաստանում գործազրկության մակարդակը շարունակում է բարձր մնալ, տնտեսապես ոչ ակտիվ երիտասարդների թվաքանակը գնալով շատանում է, իսկ դա նշանակում է, որ երիտասարդները չեն կարողանում իրենց ներուժը իրացնել աշխատաշուկայում: Այս խնդիրներին լուծում տալու համար 2012 թվականին կառավարությունը հավանության արժանացրեց Հայաստանում մասնագիտական կողմնորոշման համակարգի զարգացման հայեցակարգը:
«Ուզում եմ, կարող եմ, պետք է»: ՀՀ աշխատանքի և սոցիալական հարցերի նախարարության մասնագիտական կողմնորոշման և կարողությունների զարգացման կենտրոնի տնօրեն Հայկուհի Գևորգյանը փաստում է՝ սա աշխատաշուկայում հաջողված մասնագիտություն գտնելու բանաձևն է:
Մասնագիտական կողմնորոշում պետք է սկսել դեռևս նախադպրոցական տարիքից, փաստում է մասնագետը և նշում, որ այդ տարիքում է, երբ երեխայի վրա արտաքին ազդակներ չկան և կարելի է բացահայտել նրա անհատականությունը:
Հայաստանում մինչ 2026 թվականը բոլոր դպրոցներում ներդրվելու են մասնագիտական կողմնորոշման ակումբներ: Բայց մինչ այդ, ամեն ինչ արվում է քայլ առ քայլ, ինչպես Հայկուհի Գևորգյանն է նշում՝ փորձելով մշտադիտարկել, գնահատել արդյունքները:
«Այն դպրոցներում, որտեղ կներդրվի ծրագիրը 8,9,10,11 դասարանի աշակերտները կանցնեն մասնագիտական կողմնորոշում պարտադիր սկզբունքով: Ծրագրի հիմքում դրված է հմտությունների, կարողությունների զարգացումն ու տեղեկացվածության բարձրացումը: Առաջնահերթ խնդիր է երեխայի անձի ՝ նրա տիպաբանության, նախասիրությունների, հետաքրքրությունների բացահայտումը»,-ասաց նա:
Մասնագետի խոսքով՝ գործընթացը շարունակական բնույթ է կրում և հանրապետության դպրոցներում գործող մոտ 100 ակումբներին այս տարի կավելանան նորերը՝ընդգրկելով Երևանի և Լոռու կամ Շիրակի մարզի դպրոցները:
Հայկուհի Գևորգյանը նշում է, որ միշտ պետք է խրախուսել երեխաներին, ծնողներին համատեղ ճանաչել մասնագիտությունների աշխարհը և գիտակցել , որ մեկ մասնագիտություն ողջ կյանքի ընթացքում վաղուց պատմություն է, և յուրաքանչյուրս պետք է պատրաստ լինենք վերանայել մեր մասնագիտությունը:
Հեղինակ՝ Անի Դանիելյան
Լուսանկարները՝ Հայկ Մանուկյանի
© 2009 ARMENPRESS.am