Ծառերն ապօրինի հատել էր անտառապահը. Լոռու քրեական հետախույզների ու պարեկների բացահայտումը
21:52, 10 Օգոստոս, 2022ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ: Պարեկային ծառայության Լոռու մարզի գումարտակի ոստիկաններից մեկը օգոստոսի 7-ին, ժամը 11.30-ի սահմաններում Դիլիջան-Վանաձոր ճանապարհի հարակից անտառից բենզասղոցի ձայն լսելով՝ Դիլիջանի բաժին է ահազանգել և խնդրել, որ օպերատիվ խումբ մոտենա:
Ինչպես «Արմենպրես»-ին տեղեկացրին ՀՀ ոստիկանությունից, րոպեներ անց բաժնի քրեական հետախույզներն ու պարեկները համատեղ միջոցառումներով պարզել են, որ նույն օրը «Դիլիջան ազգային պարկի» «Շամախյան» տեղամասի անտառապահն իրեն վստահված պահաբաժնից 2 ուռենի է ապօրինի հատել:
Ըստ աղբյուրի՝ 40-ամյա անտառապահը ձերբակալվել է և, մեքենայով հանդերձ, տեղափոխվել ոստիկանության Դիլիջանի բաժին:
Նշվում է, որ նա ներկայացվել է տարածքային նախաքննական մարմին: Հանգամանքները նախաքննությամբ պարզվում են:
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
© 2009 ARMENPRESS.am