Անհայտ անձինք բրոնզագույն ներկով ներկել են Հովհաննես Շիրազի արձանը
17:52, 20 Մարտ, 2017ԵՐԵՎԱՆ, 20 ՄԱՐՏԻ, ԱՐՄԵՆՊՐԵՍ: Երեւանի Մալաթիա Սեբաստիա համայնքի «Սուրբ Երրորդություն» եկեղեցու մոտակա՝ «Երիտասարդություն» զբոսայգում գտնվող Հովհաննես Շիրազի արձանն անհայտ անձինք ներկել են բրոնզագույն ներկով: Պատմամշակութային արգելոց-թանգարանների եւ պատմական միջավայրի պահպանության ծառայությունից հայտնեցին, որ կատարվածի վերաբերյալ տեղեկատվություն ստացել են եւ դատապարտում են հուշարձանների նկատմամբ նման վերաբերմունքը:
«Հովհաննես Շիրազի արձանը հուշարձանների պետական ցուցակում ընդգրկված չէ, սակայն Երեւան քաղաքի հուշարձանների պահապանը եղել է տեղում, արձանագրել վիճակը: Այդ մասին գրավոր կիրազեկվի Մալաթիա Սեբաստիա վարչական շրջանի ղեկավարությունը և ՀՀ մշակույթի նախարարությունը»,-«Արմենպրես»-ի հետ զրույցում ասաց «Պատմամշակութային արգելոց-թանգարանների և պատմական միջավայրի պահպանության ծառայության» ՊՈԱԿ-ի հասարակայնության և լրատվության հետ կապերի բաժնի վարիչ Մարինե Ավանեսյանը:
© 2009 ARMENPRESS.am