ՌԴ-ում Հայաստանի դեսպանը կարևորում է արտագնա հյուպատոսական ծառայությունների ինստիտուտի գործունեությունը
16:26, 22 Մարտ, 2017ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Ռուսաստանի կենտրոնական և արևելյան հատվածներում ապրող Հայաստանի քաղաքացիների փաստաթղթային գործարքները տեղում կատարելու համար հյուպատոսները ժամանակ առ ժամանակ այցելություններ են կատարելու հեռավոր շրջաններ: «Արմենպրես»-ի հաղորդմամբ` մարտի 22-ին լրագրողների հետ հանդիպման ժամանակ այս մասին ասաց ՌԴ-ում Հայաստանի արտակարգ և լիազոր դեսպան Վարդան Տողանյանը:
«Ռուսաստանի կենտրոնական և արևելյան շրջաններում Հայաստանի քաղաքացիների մոտ խնդիր է առաջանում ինչ-որ փաստաթուղթ ստանալու համար: Դեպքեր են լինում, որ փաստաթուղթ ստանալու համար քաղաքացուն անհրաժեշտ է 9 ժամ: Ուստի Հայաստանի Հանրապետության արտաքին գործերի նախարարության հետ աշխատում ենք արտագնա հյուպատոսական ծառայության ինստիտուտի բացման ուղղությամբ: Այսինքն` հյուպատոսները որոշ ժամանակով այցելելու են այդ հեռավոր շրջանները, փաստաթղթերի հետ աշխատանք կատարելու նպատակով»,- ասաց Տողանյանը: Ըստ նրա` մոտակա շրջանում չի նախատեսվել նոր հյուպատոսարաների բացում:
Դեսպանի խոսքով` ինքն անձամբ աշխատանքային այցեր է կատարելու Ռուսաստանի տարբեր հատվածներ, հատկապես՝ Ուրալյան և Անդրուրալյան երկրամասեր:
«Այնտեղ գոյություն ունի տնտեսական համագործակցության մեծ հեռանկար, ուստի շատ կարևոր է այդ հեռավոր մասերում ցուցադրել մեր մշակույթը, ավանդույթները և հնարավորությունները»,- նշեց Տողանյանը:
Տողանյանը մտադրված չէ ուժերը չափել ադրբեջանցի գործընկերների հետ:
«Մենք կանեն այն, ինչ արել ենք նախկինում: Հայ-ռուսական հարաբերությունները գտնվում են բարձր մակարդակի վրա բոլոր բնագավառներում` ռազմաքաղաքական, առևտրատնտեսական, մշակութային: Մեր համագործակցությունը սերտ է նաև փորձագիտական, դիվանագիտական, քաղաքացիական հարթակում, ուստի չեմ կարծում, որ մենք պետք է համեմատվենք ուրիշի հետ: Դեսպանատունն ունի իր ուրույն նպատակները, որը բխում է հայ ժողովրդի շահերից: Մյուս կողմից, մենք աշխատելու ենք բոլորի հետ, ոչ մի սահմանազատում չի լինելու»,- ընդգծեց Տողանյանը:
© 2009 ARMENPRESS.am