ԵՐԵՎԱՆ, 4 ԱՊՐԻԼԻ, ԱՐՄԵՆՊՐԵՍ: Հայաստանի Հանրապետության Կենտրոնական ընտրական հանձնաժողովը տեղեկություններ է հրապարակել Երևանի ավագանու առաջիկա ընտրություններին ընտրելու իրավունք ունեցող քաղաքացիների թվի վերաբերյալ: Ինչպես հաղորդում է «Արմենպրես»-ը, ՀՀ ոստիկանության անձնագրային և վիզաների վարչության կողմից ԿԸՀ-ին տրամադրված տեղեկատվության համաձայն` Երևանի ավագանու ընտրություններին մասնակցելու իրավունք ունի 841 հազար 973 ընտրող:

Երևանի ավագանու ընտրություններին մասնակցելու համար քաղաքական ուժերն առաջադրման փաստաթղթերը պետք է ներկայացնեն մինչև ապրիլի 9-ը, ժամը 18:00-ն, սակայն այս պահի դրությամբ որևէ քաղաքական ուժ առաջադրման փաստաթղթեր չի ներկայացրել:

Երևանի ավագանու ընտրությունները տեղի կունենան մայիսի 14-ին: Նախընտրական քարոզչությունը կմեկնարկի ապրիլի 21-ին և կավարտվի մայիսի 12-ին: