ԳԱՎԱՌ, 14 ՄԱՅԻՍԻ, ԱՐՄԵՆՊՐԵՍ։ Գեղարքունիքի մարզի Գավառի համայնքապետարանում կայացել է համայնքի ավագանու վեցերորդ նստաշրջանի չորրորդ նիստը, որը վարել է Գավառ համայնքի ղեկավար Գուրգեն Մարտիրոսյանը։

Ինչպես «Արմենպրես»-ը տեղեկացավ Գավառի համայնքապետարանի աշխատակազմից, օրակարգի հարցերի հաստատումից հետո համայնքապետարանի աշխատակազմի ֆինանսատնտեսագիտական, եկամուտների հաշվառման և հավաքագրման բաժնի պետ Տիգրան Բրսիկյանը զեկուցել է  Գավառ համայնքի ավագանու 2023 թվականի դեկտեմբերի 13-ի N 282-Ա որոշմամբ հաստատված «Գավառ համայնքի կոմունալ սպասարկում և բարեկարգում» համայնքային հիմնարկի հաստիքացուցակում փոփոխություն կատարելու, Գավառ համայնքի հաշվեկշիռ գույք մուտքագրելու և «Գավառ համայնքի կոմունալ սպասարկում և բարեկարգում» համայնքային հիմնարկին անհատույց օգտագործման իրավունքով հատկացնելու և գույքահարկի գծով արտոնություններ սահմանելու մասին հարցերը։

Դրամական օգնություններ տրամադրելու մասին հարցերը ավագանու հաստատմանն է ներկայացրել համայնքապետարանի աշխատակազմի գլխավոր մասնագետ Վարսենիկ Խաչատրյանը։

Աշխատակազմի քաղաքաշինության և հողաշինության բաժնի պետ Դավիթ Մազմանյանը զեկուցել է «Համայնքային սեփականություն հանդիսացող ավտոտնակը և ավտոտնակի զբաղեցրած ու սպասարկման համար հատկացված հողամասերը, համայնքային սեփականություն հանդիսացող հողամասերն ուղղակի վաճառքի միջոցով, աճուրդային կարգով, կառուցապատման իրավունքով օտարելու  և Գավառ համայնքի գլխավոր հատակագծում կատարված փոփոխությունը հաստատելու մասին» հարցերը։

«Գավառ համայնքի սեփականություն հանդիսացող նոր ձեռքբերված գույքերն ամենամյա պարտադիր գույքագրման փաստաթղթերում ներառելու և «Գավառի թիվ 5 հիմնական դպրոց» ՊՈԱԿ-ին անհատույց գույք տրամադրելու մասին» հարցերը զեկուցեց աշխատակազմի ֆինանսատնտեսագիտական, եկամուտների հաշվառման և հավաքագրման բաժնի առաջատար մասնագետ Մերի Սարիբեկյանը։

Ֆինանսատնտեսագիտական, եկամուտների հաշվառման և հավաքագրման բաժնի առաջատար մասնագետ Գևորգ Աղլամազյանը զեկուցել է «Գույքահարկի գծով արտոնություններ սահմանելու և սահմանված արտոնությունները Գավառ համայնքի 2024 թվականի բյուջեից փոխհատուցելու մասին» հարցը։

Զեկուցողները պատասխանել են  ավագանու անդամների հարցերին։

Ավագանու անդամները քվեարկությամբ հաստատել են օրակարգում ներառված բոլոր հարցերը։

Որոշվել է  նաև Գավառ համայնքի ավագանու 2024 թվականի վեցերորդ նստաշրջանի հինգերորդ նիստի օրը, որը տեղի կունենա հունիսի 10-ին։

Խոսրով Խլղաթյան