ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ: Որոշ ժամանակ Ադրբեջանում Շվեյցարիայի դեսպանատանը թաքնված՝ Լրագրողների ազատության եւ անվտանգության ինստիտուտի ղեկավար Էմին Հուսեյնովը քաղաքական ապաստան է խնդրել Շվեյցարիայում:

Այս մասին, ինչպես հաղորդում է «Արմենպրես»-ը, Հուսեյնովը հայտնել է Rundschau թերթին եւ SRF հեռուստաալիքին տված հարցազրույցում:

«Ներկա իրավիճակում ամենաճիշտը Շվեյցարիայում քաղաքական ապաստան խնդրելն էր», -ասել է նա:

Շվեյցարական ATC գործակալությոընը հունիսի 13-ին հաղորդել էր, որ Էմին Հուսեյնովը Շվեյցարիայի ԱԳՆ բարձրաստիճան դիվանագետի ուղեկցությամբ լքել է Ադրբեջանը: Շվեյցարացի դիվանագետը հունիսի 12-ին Բաքու էր ժամանել Եվրոպական խաղերի բացման արարողությանը մասնակցելու նպատակով:

Էմին Հուսեյնովը Ադրբեջանում մեղադրվում է «խոշոր եկամուտների ստանալու նպատակով ապօրինի ձեռնարկատիրությամբ զբաղվելու», «հարկերից խուսափելու» եւ «պաշտոնեկան լիազորությունները չարաշահելու» մեջ:

Իր գործունեության շրջանակում ադրբեջանական կառավարությանը քննադատելու պատճառով նման կեղծ մեղադրանքներ ներկայացվելուց հետո Էմին Հուսեյնովը ապաստան էր խնդրել Բաքվում Շվեյցարիայի դեսպանատանը:

Անհայտ է մնում այն, թե Ադրբեջանում նման «հանցագործություներ» կատարած Հուսեյնովին ինչու են Բաքվի իշխանությունները թույլ տվել հեռանալ Ադրբեջանից: