ԳԱՎԱՌ, 29 ՀՈՒԼԻՍԻ, ԱՐՄԵՆՊՐԵՍ : Գեղարքունիքի մարզի երկրագործական տնտեսություններում հուլիսի 27-ից սկսվել եւ ընթանում է հացահատիկային մշակաբույսերի բերքահավաքը: Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի գյուղատնտեսության եւ բնապահպանության վարչության պետ Վանիկ Հովհաննիսյանը, առաջին հեկտարներից հնձված գարու արտերում միջին բերքատվությունը կազմել է մոտ 15 ցենտներ:

Շատ նվազ է ստացվել ծղոտը` սպասվածից կիսով չափ պակաս, քանի որ երաշտի պատճառով բույսի ցողունը մնացել է անչափ կարճ, նույնիսկ այնքան, որ որոշ տեղերում կոմբայնը դժվարանալու է հնձել արտերը:»Դեռ լավ է, որ գարին հասցրել է հասկակալել: Այնտեղ, ուր կոմբայնը չի կարողանա հնձել արտերը, հավանաբար, մարդիկ ստիպված կլինեն դրանք հնձել ձեռքով եւ ապա հասկը ցողունից առանձնացնել կոմբայնների օգնությամբ: Բերքահավաքի հետագա ընթացքը ցույց կտա, թե որքան են կազմել երաշտի պատճառած վնասները»,-նշեց վարչության պետը:

Ցորենի մեկ հեկտարի միջին բերքատվությունն առայժմ կազմում է մոտ 25 ցենտներ: Հացի բերքահավաքը Գեղարքունիքում կշարունակվի մինչեւ օգոստոսի վերջերը:

Խոսրով Խլղաթյան