ՌԴ-ում ՀՀ դեսպանը կարևորեց Հայաստան-ԵՄ հարաբերությունների դինամիկ զարգացումը
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Հայաստանը Եվրամիության հետ հարաբերությունները դինամիկ կերպով զարգացնում է: «Արմենպրես»-ի հաղորդմամբ` մարտի 22-ին լրագրողների հետ հանդիպման ժամանակ նման կարծիք հայտնեց ՌԴ-ում Հայաստանի արտակարգ և լիազոր դեսպան Վարդան Տողանյանը: Նրա խոսքով` «կամ-կամ» քաղաքականությանը ծանոթ չէ:
«Համենայն դեպս, նման քաղաքականություն չկա, մեր արտաքին քաղաքականության օրակարգում չի եղել։ Մեր հարաբերությունները բավական համահունչ զարգանում են: Մարտի 21-ին Երևանում նախաստորագրվել է ԵՄ-ի հետ նոր ձևաչափի պայմանագիրը, ամառը պետք է այն վերջնական ստորագրվի։ Սա խոսում է այն մասին, որ հարաբերությունները դինամիկ զարգանում են, մասնավորապես, առևտրատնտեսական ոլորտում, որտեղ մենք շատ հետաքրքիր արտոնություններ ունենք ԵՄ-ում մեր ապրանքների համար»,- ասաց Տողանյանը:
Նրա խոսքով` ԵՄ-ի հետ նոր պայմանագիրը չի հակասում կամ ուղղված չէ որևէ միության կամ երկրի դեմ:
«Աշխարհում միջազգային հարաբերությունների փոփոխման տեկտոնիկ երևույթներ են ընթանում, ուստի Հայաստանը դրան համահունչ հարաբերություններ պետք է զարգացնի ու ամրապնդի իր շահերը»,- ընդգծեց Տողանյանը: