Արազ Օզբիլիսը խփած գնդակը նվիրում է Գևորգ Ղազարյանին
ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Ֆուտբոլի Հայաստանի ազգային թիմի անդամ Արազ Օզբիլիսը Ղազախստանի դեմ խաղում խփած գնդակը նվիրում է Գևորգ Ղազարյանին:
«Մենք ունենք ևս երեք միավոր և ուրախ ենք երկրպագուների և բոլորի համար: Ես անընդհատ աշխատում եմ ինձ վրա, և դա միակ բանն է, որ կարող եմ անել: Խփածս գնդակը նվիրում եմ Գևորգ Ղազարյանին: Հույս ունեմ, շուտ կլավանա: Մենք ուրախ ենք նման երկրպագության համար: Ամեն ինչ անում ենք հենց նրանց (ֆուտբոլասերների-խմբ.) համար»,-«Արմենպրես»-ի հաղորդմամբ` լրագրողների հետ զրույցում ասաց Օզբիլիսը:
Հայաստանի հավաքականը հաղթեց ղազախստանյան թիմին:
Նախնական հետազոտությամբ Գևորգ Ղազարյանի մոտ ախտորոշվել է ծնկի խաչաձև կապանների մասնակի պատռվածք և մենիսկի վնասվածք: Նրա ոտքն այժմ գիպսի մեջ է: Նա արդեն վաղը կմեկնի Գերմանիա` հետազոտության: Ամենայն հավանականությամբ, ֆուտբոլիստը կենթարկվի վիրահատության: