Մելանյա Թրամփն Իսրայելում հրաժարվել է բռնել ամուսնու ձեռքը
ԵՐԵՎԱՆ, 22 ՄԱՅԻՍԻ« ԱՐՄԵՆՊՐԵՍ: ԱՄՆ նախագահ Դոնալդ Թրամփի կինը՝ Մելանյան, Թել-Ավիվի օդանավակայանում չի բռնել ամուսնու ձեռքը: «Արմենպրես»-ի փոխանցմամբ, տեսանյութը հրապարակել է Newsweek պորտալը: Դրանում տեսանելի է, թե ինչպես է ԱՄՆ առաջնորդը բավականին երկար մեկնում ձեռքը կնոջ ուղղությամբ: Սկզբում Մելանյան այն անտեսում է, այնուհետև թեթև հարվածում ամուսնու ձեռքի ափին: Դրանից հետո վշտացած Թրամփը սկսում է կարգավորել փողկապը: «Այս ժեստը հատուկ է այն մարդկանց, որոնց ձեռքը հրապարակայնորեն հրաժարվում են բռնել»,- հեգնել է հոդվածի հեղինակը:
Պորտալը ճշգրտում է, որ դեռևս հիմքեր չկան կարծելու, որ Դոնալդ Թրամփի ընտանիքում կան խնդիրներ:
Ավելի վաղ ԶԼՄ-ներն ուշադրություն էին հրավիրել նրա վրա, որ ԱՄՆ առաջին տիկինը նյարդային է եղել Թրամփի երդմնկալության ժամանակ: Սոցիալական ցանցերում տեսանյութ էր հայտնվել, որում Մելանյան ամուսնուն նայելով ժպտում է և ակնթարթորեն դառնում մռայլ, երբ նա շրջվում է: