ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Հայաստանում Սիրիայի դեսպան Նորա Արիսյանի խոսքով՝ եթե Թուրքիան պատժված լիներ  ավելի քան մեկ դար առաջ իրականացրած Ցեղասպանության համար, միանշանակ  չէր համարձակվի ահաբեկչական արարքներն ու գործողությունները Սիրիայում:

«Արմենպրես»-ի հաղորդմամբ՝ դեսպանն այս մասին ասաց Ծիծեռնակաբերդի հուշահամալիրում լրագրողների հետ ճեպազրույցում:

«Սիրիան 12 տարի է, ինչ դիմադրում է այդ ահաբեկչական գործողություններին: Դժբախտաբար, պանթուրքիստական ծրագրերը տակավին շարունակվում են և՛ Սիրիայում, և՛  ընդհանրապես տարածաշրջանում»,- ասաց դեսպանը:

Նորա Արիսյանը մեծ հպարտությամբ նշեց, որ 2020 թվականին Սիրիայի Ազգային ժողովը միաձայն ճանաչեց Հայոց ցեղասպանությունը, և կոչ արեց բոլոր այն երկրներին, որոնք դեռ չեն ճանաչել Ցեղասպանությունը, հետևել Սիրիայի օրինակին:

«Սիրիայի  ժողովուրդը Հայոց ցեղասպանության առաջին ականատեսն է եղել, և առաջիններից է, որ Ցեղասպանությունից փրկված հայերին սրտաբաց ընդունել է: Այսօր մեզ հետ Ցեղասպանության հուշահամալիրում է Սիրիայի Ազգային ժողովից պատվիրակություն, և նրանք  նույնպես եկել են զորավիգ կանգնելու Հայաստանին, աջակցելու  և կրկին անգամ հիշատակելու, որ Ցեղասպանությունը  միայն պատմական արարք չէ ու այն պետք է  ճանաչել»,- նշեց Հայաստանում Սիրիայի դեսպանը: