Վրաստանում բողոքի ակցիայի մասնակցած ԵՄ երկրների ԱԳ նախարարներին մեղադրել են իշխանությունը տապալելու փորձին աջակցելու մեջ
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: Վրաստանի խորհրդարանի խոսնակ Շալվա Պապուաշվիլին Թբիլիսիում «Օտարերկրյա ազդեցության թափանցիկության մասին» օրենքի դեմ կազմակերպված ցույցին մասնակցած օտարերկրյա քաղաքական գործիչներին մեղադրել է Վրաստանի կառավարությունը տապալելու փորձի մեջ։ «Արմենպրես»-ի փոխանցմամբ՝ այս մասին Պապուաշվիլին գրել է Facebook սոցիալական ցանցում:
«Վրդովված երիտասարդների խմբին դիմելը, որոնց ռադիկալ ընդդիմադիր կուսակցությունները տրամադրում են կառավարության դեմ, և նրանց «ամբողջ ժողովուրդ» անվանելը մի արարք է, որն ավելի շատ սպասելի է սովետական կամ ռուսական քարոզչությունից, քան Եվրամիության անդամ երկրի արտաքին գործերի նախարարներից: Դեռ ավելին` նպաստել ժողովրդավարական ճանապարհով ընտրված կառավարության տապալման փորձին այն բանի համար, որ քեզ դուր չի գալիս նրա կողմից ընդունված օրենսդրությունը, խորհրդային շրջանի ձեռնարկի կրկնօրինակի է նման», - գրել է Պապուաշվիլին։
Նա հատկապես առանձնացրել է Բալթյան երկրներին:
«Օտարերկրյա ազդեցության թափանցիկության մասին» օրինագծի ընդունման դեմ կազմակերպված ցույցին մայիսի 15-ին մասնակցել են աշխատանքային այցով Վրաստանում գտնվող Լիտվայի, Էստոնիայի և Իսլանդիայի արտգործնախարարները։ Նրանք բեմ են բարձրացել և իրենց աջակցությունը հայտնել ցուցարարներին։
Բաժանորդագրվեք մեր ալիքին Telegram-ում