Մոսկվան Փարիզին և Վաշինգտոնին կտեղեկացնի ԼՂ հակամարտության կարգավորման ընթացքի մասին
ԵՐԵՎԱՆ, 27 ՀՈՒՆԻՍԻ, ԱՐՄԵՆՊՐԵՍ: Ռուսաստանն առաջիկա օրերին ԵԱՀԿ-ի Մինսկի խմբի համանախագահ երկրների ներկայացուցիչներին կտեղեկացնի Լեռնային Ղարաբաղի հակամարտության կարգավորման շուրջ Սանկտ Պետերբուրգում Հայաստանի եւ Ադրբեջանի նախագահների հետ ՌԴ նախագահ Վլադիմիր Պուտինի հանդիպման արդյունքների մասին: Ինչպես տեղեկացնում է «Արմենպրես»-ը, այդ մասին «ՌԻԱ Նովոստի»-ին հայտնել Է Կրեմլի աղբյուրը:
«Մեր ղեկավարը Պիտերում Ալիեւի եւ Սարգսյանի հետ հանդիպման արդյունքների մասին առաջիկա օրերին կտեղեկացնի Մինսկի խմբի համանախագահողներին: Կանցկացնի հեռախոսազրույցներ»,-ասել է գործակալության զրուցակիցը:
Ռուսաստանի, Հայաստանի եւ Ադրբեջանի ղեկավարների հանդիպումը տեղի է ունեցել հունիսի 20-ին Սանկտ Պետերբուրգում:
Հանդիպման արդյունքների վերաբերյալ ղեկավարների ընդունած համատեղ հայտարարության մեջ ասվում Է, որ նախագահները փոխըմբռնում են արձանագրել մի շարք հարցերի շուրջ, որոնց լուծումը թույլ կտա առաջընթացի հասնել ԼՂ հակամարտության կարգավորման հարցում:
Բաժանորդագրվեք մեր ալիքին Telegram-ում