ԵՐԵՎԱՆ, 14 ՀՈՒԼԻՍԻ, ԱՐՄԵՆՊՐԵՍ: Եվրասիական տնտեսական հանձնաժողովում ԵԱՏՄ անդամ-պետությունների լիազոր մարմինների ներկայացուցիչների մասնակցությամբ քննարկվել են միության «Ալկոհոլային արտադրանքի անվտանգության» տեխնիկական կանոնակարգի նախագծի շուրջ տարաձայնությունները: Ինչպես «Արմենպրես»-ին տեղեկացրին ԵՏՀ մամուլի ծառայությունից, քննարկմանը ներկա են եղել անդամ-երկրների լիազոր մարմինների, գիտական ինստիտուտների, ինչպես նաև բիզնես հանրության ներկայացուցիչները: Կողմերը քննարկել են հինգ հարցեր, որոնց շուրջ կան տարաձայնություններ: Խոսքը վերաբերում է թույլ ալկոհոլային խմիչքների սպառողական փաթեթավորման հանդեպ մի շարք պահանջների հաստատմանը, գարեջրի արտադրությունում շաքար պարունակող բաղադրիչների կիրառման սահմանափակմանը: 

Մյուսը` թույլ ալկոհոլային խմիչքներում այնպիսի բաղադրիչների, ինչպիսին են կոֆեինը, տաուրինը, օգտագործման արգելքի հաստատմանը, ինչպես նաև լիկյորի,  մրգային գինու և այլ խմիչքներում ռեկտիֆիկացված էթիլային սպիրտի օգտագործման արգելքին: Կողմերը համաձայնության դեռևս չեն եկել ալկոհոլային արտադրանքի համապատասխանության հաստատման ձևի վերաբերյալ: Քննարկման մասնակիցները որոշել են վերջնականացնել ԵԱՏՄ «Ալկոհոլային արտադրանքի անվտանգության» տեխնիկական կանոնակարգի նախագիծն ու այն ուղարկել Հանձնաժողովի Կոլեգիայի նիստի քննարկմանը: