Գյուլենը Թուրքիայի ռազմական հեղաշրջման փորձի կազմակերպիչ է համարում Էրդողանին
ԵՐԵՎԱՆ, 24 ՍԵՊՏԵՄԲԵՐԻ, ԱՐՄԵՆՊՐԵՍ: Չափավոր իսլամի քարոզիչ Ֆեթուլլահ Գյուլենը մեղադրել է Թուրքիայի նախագահ Ռեջեփ Թայիփ Էրդողանին երկրում հուլիսի 15-ի ռազմական հեղաշրջման փորձը կազմակերպելու մեջ: Ինչպես հաղորդում է «Արմենպրես»-ը, գերմանական և իսպանական լրատվամիջոցներին տված հարցազրույցում Գյուլենն ասել է, որ Էրդողանը դեռ տարիներ առաջ է ծրագրել ռազմական հեղաշրջում իրականացնել, սակայն սպասել է հարմար պահի:
Նրա խոսքով` Թուրքիայի նախագահը հեղաշրջման փորձն օգտագործել է իր համար անցանկալի անձանց պաշտոններից հեռացնելու, ձերբակալելու, իր իշխանությունն ամրապնդելու համար: Անդրադառնալով այն փաստին, որ նախկինում աջակցել է Էրդողանին` Գյուլենը պարզաբանել է, որ դրա պատճառը «Թուրքիան ԵՄ ճանապարհով նախապատրաստելու, մարդու իրավունքները և ժողովրդավարությունն ամրապնդելու հարցում Էրդողանի տված խոստումն» է եղել: Նա իր և Էրդողանի միջև հարաբերությունների վատացումը մեկնաբանել է որպես «սպասելիքները չարդարացրած Էրդողանի վրեժ»:
«Էրդողանը հույս ուներ, որ նրան հայտարարելու էինք ողջ աշխարհի մուսուլմանների առաջնորդը, ողջ աշխարհով մեկ աշխատելու էինք այդ ուղղությամբ: Երբ տեսավ, որ նման բան չի լինելու, մեր դեմ դուրս եկավ»,- Deutsche Welle-ի փոխանցմամբ` ասել է Գյուլենը:
Նա ընդգծել է, որ մտավախություն չունի, թե ԱՄՆ-ն կարող է արտահանձնել իրեն Թուրքիա:
78-ամյա Գյուլենը ասել է նաև, որ կարոտում է Թուրքիան և ցանկություն է հայտնել, որ իր մահից հետո աճյունը տարվի Թուրքիա ու ամփոփվի մոր կողքին:
Ֆեթուլլահ Գյուլենը 1999թ. որպես վտարանդի բնակվում է ԱՄՆ Փենսիլվանիա նահանգում: Թուրքիայի իշխանությունները նրան են մեղադրում երկրում հուլիսի 15-ի ռազմական հեղաշրջման փորձը կազմակերպելու մեջ և պահանջում ԱՄՆ իշխանություններից արտահանձնել Գյուլենին:
Բաժանորդագրվեք մեր ալիքին Telegram-ում