ԵՐԵՎԱՆ, 24 ՍԵՊՏԵՄԲԵՐԻ,ԱՐՄԵՆՊՐԵՍ: ԱՄՆ նախագահ Բարաք Օբաման արգելք է դրել այն օրինագծի վրա, որը թույլ էր տալիս 2001 թվականի սեպտեմբերի 11-ի ահաբեկչության զոհերի հարազատներին դատի տալ Սաուդյան Արաբիայի կառավարությանը: BBC-ի փոխանցմամբ, Օբաման, խորին ցավակցություն հայտնելով զոհվածների ընտանիքներին, նշել է, որ օրենքի ընդունումը կարող է վնասել ԱՄՆ ազգային շահերին: Ինչպես հաղորդում է «Արմենպրես»-ը` վկայակոչելով «Ինտերֆաքս»-ը,  Էր Ռիադը հերքում է մասնակցությունն ահաբեկչությանը, որը խլել է շուրջ 3000 մարդու կյանք:

Նախօրեին ԱՄՆ Կոնգրեսի կողմից ընդունված «Ահաբեկչության հովանավորների դեմ արդարադատության» մասին ակտը հնարավորություն կտար զոհվածների հարազատներին դատի տալ Սաուդյան Արաբիայի կառավարության ցանկացած անդամի: Կոնգրեսի անդամների ճնշող մեծամասնությունը հավանություն էր տվել օրինագծին, սակայն հաշվի առնելով օրինագծի շուրջ Օբամայի մտահոգությունները, կոնգրեսականները քիչ հավանական էին համարում, որ նախագահն այն կստորագրի: