Մեկնարկում է տեխնոլոգիական մասնագիտություններով դասընթացների գրանցման գործընթացը
ԵՐԵՎԱՆ, 18 ՀՈՒՆԻՍԻ, ԱՐՄԵՆՊՐԵՍ: ՀՀ բարձր տեխնոլոգիական արդյունաբերության նախարարությունը հայտարարում է «Մասնագետների պատրաստման ԲՈՒՀ-մասնավոր հատված համագործակցություն» 2021 ծրագրի մեկնարկի մասին: «Արմենպրես»-ին այս մասին հայտնեցին ՀՀ բարձր տեխնոլոգիական արդյունաբերության նախարարությունից:
Հայտարարված մրցույթների արդյունքների ամփոփման արդյունքում ընտրվել են դասընթացների կազմակերպման և անցկացման համար լավագույն ծրագիրը ներկայացրած կրթական հաստատությունները:
Դասընթացներն անցկացվելու են առցանց՝ նշված ուղղություններով․
«Տվյալագիտություն» (Data Science), «JavaScript ծրագրավորման լեզվի I մակարդակ (Beginner), «JavaScript ծրագրավորման լեզվի II մակարդակ (Intermediate), «SS վաճառքներ» (IT Sales), «Պրոդուկտի կառավարման (Product Management) II մակարդակ (Intermediate)», «Նախագծերի կառավարում» (Project management), «UI/UX մասնագիտացման II մակարդակ», «C#/․Net ծրագրավորման լեզվի II մակարդակ», «Որակի ապահովման (Quality assurance) II մակարդակի դասընթաց (automation), «DevOps մասնագիտացման դասընթաց», «Մեքենայական ուսուցման» (ML) II մակարդակ (Intermediate) «Կիբերանվտանգություն» (Cybersecurity), «Python ծրագրավորման լեզվի I մակարդակ» (Beginner), «Python ծրագրավորման լեզվի II մակարդակ» (Intermediate)Մասնակիցները կհանձնեն ընդունելության քննություն, որի արդյունքների հիման վրա՝ Երևանում՝ 30-70%, մարզերում և Արցախի Հանրապետությունում՝ 40-80%-ի չափով, պետության կողմից կֆինանսավորվի ուսման վարձը։
Նշված մասնագիտություններով հայտերի ընդունման գործընթացը շուտով կմեկնարկի։ Այն հասանելի կլինի edu.hti.am կայքում: