Սիրիայի արտգործնախարարը կրկին պահանջել է, որ Թուրքիան հեռացնի իր զորքերը
ԵՐԵՎԱՆ, 11 ՀՈԿՏԵՄԲԵՐԻ, ԱՐՄԵՆՊՐԵՍ: Սիրիայի արտգործնախարար Ֆեյսալ Ալ- Միկդատը կրկին պահանջել է, որ Թուրքիան իրենց երկրի տարածքից հեռացնի զորքերը:
Այս մասին, ինչպես հաղորդում է «Արմենպրես»-ը, հայտնում է թուրքական «Ջումհուրիեթ» պարբերականը:
Մոսկվայում Սիրիայի նախագահ Ասադի և Պուտինի հանդիպումը մեկնաբանելով՝ Սիրիայի արտգործնախարարը ևս մեկ անգամ պահանջել է, որ Թուրքիան իր զորքերը հեռացնի Սիրիայի տարածքից:
Միկդատը նշել է նաև, որ Ասադ-Պուտին բանակցությունները շատ լավ են անցել, և որ իրենք համակարծիք են ահաբեկչության դեմ պայքարում:
Սիրիայի արտգործնախարարը զորքերը դուրս բերելու պահանջ է ներկայացրել նաև ԱՄՆ-ին:
Ավելի վաղ նա այս պահանջը Թուրքիային և ԱՄՆ-ին ներկայացրել էր նաև ՄԱԿ-ի գլխավոր ասամբլեայի 76-րդ նստաշրջանում: