Բռնցքամարտի ԱԱ. Դարչինյանը և Տոնականյանը լքում են պայքարը, Չալոյանը հաջորդ փուլում է
ԵՐԵՎԱՆ, 1 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի բռնցքամարտի հավաքականի մի քանի անդամներ լքել են պայքարն աշխարհի առաջնությունում:
«Արմենպրես»-ի հաղորդմամբ` 60 կգ քաշային կարգի 1/8 եզրափակիչում Հայաստանի հավաքականի անդամ Կարեն Տոնականյանը մրցել է Ֆրանսիայից Սոֆիանե Օումիհեի հետ: Երրորդ ռաունդում Տոնականյանը ձեռքի վնասվածք է ստացել և չի շարունակել պայքարը:
71 կգ քաշային կարգում 1/8 եզրափակիչում Արման Դարչինյանը մենամարտել է ԱՄՆ-ի ներկայացուցիչ Օբեդ Բարտիեի հետ և զիջել 1:4 հաշվով:
Բանակայինների աշխարհի առաջնության բրոնզե մեդալակիր Դավիթ Չալոյանը գերծանր քաշային կարգում առաջ է շարժվում նաև մեծահասակների աշխարհի առաջնությունում: Գյումրեցի մարզիկը կամային գեղեցիկ հաղթանակ տոնեց Կոլումբիան ներկայացնող Քրիստիան Սալգադոյի նկատմամբ: 1/4 եզրափակիչում Չալոյանի մրցակիցը ուզբեկ Լազիզբեկ Մուլիջանովն է, որի հետ մրցելու փորձ հայ մարզիկն արդեն ունի: Մենամարտը կկայանա նոյեմբերի 2-ին: